Os recursos de impulso dixital de Google, a disposición dun centenar de PEME en Santiago
venres, 1 de xullo do 2016
Máis
de cen
PEME galegas xuntáronse este xoves 30 na sede da Cámara de Comercio
de Santiago para participaren no obradoiro presencial de Activa o teu
Negocio, o proxecto impulsado por Google co obxectivo de
optimizar a presenza e actividade en liña das PEME a través de
formación en competencias dixitais e no que concorren como socios a
Fundación INCYDE das Cámaras de Comercio, BBVA e CEPYME. No
obradoiro presencial, de cinco horas de duración, os nosos
profesionais e empresarios aprenderon os pasos que deben seguir para
definir a estratexia dixital da súa empresa.
Esta
formación, informa a Cámara, compleméntase con 23 módulos
dixitais con contidos creados por especialistas sobre presenza en
liña, comercio electrónico, redes sociais ou buscadores, froito da
colaboración de máis de 100 expertos en tecnoloxía e competencias
dixitais de Europa e avalada por IAB Europe e IAB Spain.
O
secretario xeral da Cámara de Comercio de Santiago, Fernando Barros,
indicou que “a día de hoxe, nun mundo globalizado, é fundamental
para as pequenas e medianas empresas adquirir os coñecementos
básicos precisos para dixitalizaren o seu negocio e iniciar o camiño
cara ao éxito en liña”. E engadiu: “As PEME do sector comercial
deben especializarse na venda
online
para poder competir coas grandes multinacionais que desde hai anos
están a competir na Rede”. Ademais, manifestou que a presenza en
redes sociais é imprescindíbel para dar a coñecer a empresa e
chegar a un público máis amplo.
Pola
súa banda, Cristina Hernández, coordinadora do proxecto Activa o
teu Negocio de Google, comentou que tralos bos resultados acadados co
programa Actívate, “grazas ao que formamos até agora a máis de
118.000 mozos en competencias dixitais e emprendemento”, púxose en
marcha Activa o teu Negocio para contribuír a unha mellor carreira
comercial das nosas firmas a través dunhas meirandes presenza e
participación nas novas canles. “A través desta plataforma
ofrecemos formación gratuíta de balde e dixital e ensinamos as
ferramentas que axudarán aos negocios no seu camiño cara ao éxito”,
comentou.