Os nosos emprendedores locen innovacion no Demo Day da cuarta edición de VíaGalicia
venres, 20 de xaneiro do 2017
Hoxe déronse cita en
Lugo, nas dependencias
da Fundación CEL, os responsábeis dos proxectos emprendedores
aspirantes a participar no
eixe norte da aceleradora VíaGalicia, con
“sede” na cidade da Muralla.
No Demo
Day, un novo
paso na cuarta edición
do programa de
aceleración impulsado polo Consorcio da Zona Franca de
Vigo e a Xunta,
concorreron un centenar de persoas, entre emprendedoras/es e membros
do comité encargado de avaliar proxectos. Como lembraremos,
VíaGalicia ten dúas sedes, unha en Vigo e outra (por segundo ano
consecutivo) en Lugo (xestionada pola dita fundación). A sesión de
hoxe foi
unha actividade previa á selección dos finalistas que pasarán á
fase final. Case a
totalidade dos
proxectos aspirantes, por certo, son proxectos TIC. A
cita terá continuidade este sábado en Vigo, o eixe sur de
VíaGalicia.
O obxectivo deste duplo Demo
Day é que cada
unha das propostas que participaron e remataron con éxito a fase de
academia deste programa se presenten por vez primeira e de xeito
público, en formato breve
perante o comité técnico do programa (conformado por representantes
de CZFV, GAIN,
Xesgalicia e Vigo Activo) e as entidades colaboradoras do mesmo, así
como ante observadores invitados pertencentes ao ecosistema de
emprendemento galego. A
información xerada nos Demo
Days
servirá ao dito comité para pór a derradeira puntuación ás
iniciativas e
facer unha escolma entre as preto de medio cento que
participaron na fase academia, sendo finalmente 15 (en total) as que
subirán ao derradeiro chanzo do programa, o de aceleración. Neste
treito final do camiño recibirán
unha proposta formal de financiamento por parte da Xunta e o CZFV, en
forma de préstamos participativos e subvención a fondo perdido, e
máis formación e titorías
para a aceleración e
desenvolvemento dos seus proxectos, e posta no mercado dos mesmos.
Este ano, como novidade,
seleccionaranse até un máximo de catro proxectos adicionais (en
consecuencia, serán 19 en total os proxectos que participarán na
fase final) para a aceleradora aeroespacial/aeronáutica que se está
pondo en marcha tamén en Vigo (de Lugo para esta aceleración
sectorial específica, candidata un proxecto, 3edata Enxeñaría
Ambiental).
Proxectos de Lugo
Ademais de 3edata (de
enxeñaría e toma e análise de datos ambientais utilizando drons),
entre os proxectos que superaron a fase de academia con éxito
atópanse Alazia Couture (moda feminina ecolóxica e sustentábel),
Betopfit (plataforma web, aplicación
e rede social para deportistas amantes do fitness),
Cogomelo Games (lecer dixital para dispositivos móbiles),
Filament2Print (comercio
electrónico de
materiais de impresión 3D), FittingPUP (plataforma web de control de
saúde de mascotas), IntelligentChef (plataforma que emprega robótica
e dixitalización avanzada para automatizar e optimizar as cociñas
profesionais), LoCoPLC (automatización industrial para industria
4.0, industria conectada), LoopTronic (optimización de consumos
enerxéticos e mantemento
na industria 4.0), PetiteCandela (mercado
en liña da decoración:
con ferramentas para elaboración de proxectos, app,
blog, e tenda online
de decoración), Prefapp (plataforma de servizos dixitais
en provedores da nube),
Recovery Blood (fabricación de máquina para transformar en fariña
o sangue que xeran como residuo as industrias cárnicas),
SCIPEX-ENSAMBLE (fabricación industrial 4.0 de edificios mediante
pezas conectábeis e
substituíbeis),
Tolemias (o “Netflix da música”, con
servizos de produción
e distribución de contidos musicais por internet), Wapping Rede
Intelixente de Servizos (plataforma de servizos web de mantemento
de clientes e
mercadotecnia comercial para pequenos negocios), e Youin (ferramenta
en liña
de xestión de eventos e venda de entradas).
Os proxectos seleccionados de
Lugo e Vigo que pasen a aceleración terán acceso a un financiamento
de até 125.000 euros para lanzamento (130.000 euros, no caso de
proxectos da sede de Lugo que cheguen á fase de aceleración).
En total, ViaGalicia mobiliza
nesta edición até 2.375.000 euros de financiamento para
emprendedores, entre préstamos en
participación e
achegas a fondo perdido. Desde a Fundación CEL destácase que “esta
constitúe unha gran
oportunidade para os emprendedores seleccionados, non só polo acceso
ao
financiamento senón tamén pola
evolución positiva e maduración que experimentan as empresas
participantes”.