Os investigadores do CiTIUS amosan este xoves os seus traballos en quendas de só tres minutos
mércores, 23 de xullo do 2014
O CiTIUS acollerá este xoves unha exposición
colectiva (e innovadora) de proxectos e iniciativas de investigación.
A actividade (xornada T3M:
A túa tese en 3 minutos) consiste nunha serie de
presentacións nas que os investigadores predoutorais do centro
amosarán o seu traballo nun tempo específico e reducido
(precisamente un tempo de tres minutos) e botando man dun “discurso
sinxelo e divulgativo”. Trátase pois de aplicar á tecnoloxía e á
ciencia unha máxima que nas artes e noutras formas de creatividade
vale máis que calquera outra lección sobre como narrar ou expoñer:
menos é máis.
Segundo nos contan fontes do centro da Universidade
de Santiago (emprazado no Campus Sur), a idea orixinal do concurso
provén da Universidade de Queensland (Australia), e actualmente
celébrase nas principais universidades do mundo.
O acto será avaliado por un tribunal externo, que
premiará ós participantes con maior capacidade para comunicar a súa
investigación perante un público non especializado. Este xurado
estará composto por Javier Pedreira (Wicho), co-autor do Blog
Microsiervos e responsábel de informática dos museos
científicos da cidade de A Coruña; Jorge Mira, catedrático de
electromagnetismo da Facultade de Física da Universidade de Santiago
(USC) e coñecido divulgador da ciencia; e Christian Larsson,
Enxeñeiro Mecánico, CEO e socio fundador de Larpro Engineering.
A xornada dará comezo ao fío das 9.30, co acto
oficial de inauguración. Ás 10.00 horas está programada a primeira
rolda de presentacións. A actividade insírese dentro do Programa
de Doutoramento Interuniversitario en Tecnoloxías da Información,
que conta coa Mención de Calidade do Ministerio de Educación e
Ciencia (MEC) dende a convocatoria de 2004.