Os estudios Syncrom convidan a axudar ás ONG a través do seus xogos para móbiles
mércores, 25 de marzo do 2015
A empresa española
Syncrom Entertainment,
centrada no deseño de xogos para dispositivos móbiles, anunciou
esta semana o seu fortalecemento como firma de innovación social
dixital, un ámbito de traballo do
que falamos arreo con motivo da xornada CeMIT-Innovación celebrada
este martes 24. Segundo informa Syncrom máis en detalle, o seu
compromiso co solidario collerá corpo a través de doazóns a
Organizacións Non Gobernamentais (ONG), nacionais e internacionais,
cuxo propósito sexa o de axudar nunha liña humanitaria. Ao respecto
disto, a empresa lembra que a maior parte dos seus xogos son de
balde, o que implica que o groso dos ingresos veña da publicidade,
en consecuencia cantos máis xogadores e cantos máis clics nos
anuncios, máis beneficios para as ONG.
Segundo explica Ramón
Egido, fundador de Syncrom, para acadar os devanditos obxectivos só
haberá unha regra a seguir: “Canto máis usuarios teñan os xogos,
máis ingresos xerarán, é unha simple cuestión de porcentaxes”.
Egido tamén recorda que
a idea de que as achegas de lecer da empresa fosen solidarias naceu a
principios de 2015. Segundo conta, “non somos unha ONG, estamos
constituídos como empresa e como tal temos gastos e debemos dar
beneficios, pero a idea de que eses beneficios tamén sirvan para
axudar lévanos a destinar unha porcentaxe a labores humanitarios”.
Entre as organizacións que xa se están a ver beneficiadas por esta
liña de innovación social atópase Cáritas, que dende a Syncrom
consideran que “está a facer un traballo moi necesarios nestes
anos de crise económica nos que moitas familias se viron afectadas”.
Lembrar que o primeiro
xogo dos estudios foi Bouncing Balls e o segundo Enigmas.
Os últimos lanzamentos foron Conquista a Illa Pirata, no
que uns soldados deben vencer aos piratas atrincheirados nunha serie
de illas, e Aprende as letras, un xogo educativo para nenos a
partir de 3 anos e medio que lles axuda a asociar as letras con nomes
de animais.