Os datos na nube terán unha privacidade total cun novo sistema de cifrado de AtlantTIC
xoves, 28 de abril do 2016
- Juan Ramón Troncoso, investigador do Grupo de Procesado da Sinal en Comunicación
Logo
de dez anos de traballo por parte dos investigadores do Grupo
de Procesado da Sinal en Comunicación do centro
de investigación AtlantTIC a prol de mellorar a privacidade dos
datos procesados na nube, xorde un
novo sistema de cifrado que garante a privacidade dende a orixe e
permite traballar directamente sobre os datos cifrados sen necesidade
de coñecer os seus contidos. Cómpre sinalar que este proxecto
nace ao abeiro de TÁCTICA (un proxecto de I+D centrado nas
tecnoloxías da información e a comunicación) desenvolvido no seo
da Escola de Enxeñaría de Telecomunicación da Universidade (co
apoio do Ministerio de Economía e Competitividade (MINECO) e do
Fondo Europeo de Desenvolvemento Rexional (FEDER).
En
canto á súa finalidade, Juan Ramón Troncoso, responsábel desta
liña de traballo dentro do equipo que dirixe o catedrático Fernando
Pérez González subliña que: “O noso obxectivo é protexer os
datos e dar garantías de privacidade e confidencialidade para todos
os usuarios, tanto persoas como negocios”.
Para acadar o seu fin
este equipo de profesionais desenvolveu unha serie de ferramentas
avanzadas de criptografía e procesado seguro de sinal que achegan
servizos de maneira totalmente privada e segura desde a orixe, sen
que ningunha das partes externas que interveñen no procesado dos
datos teña acceso aos mesmos. Esta tecnoloxía, que aplican
principalmente en sinais multimedia (audio, vídeo, biometría, datos
xenéticos, ADN...) permite traballar de xeito cego
sobre as comunicacións cifradas, sen necesidade de coñecer o
contido das mesmas. “Cun cifrado tradicional da canle de
comunicación non se pode ver o contido, pero tampouco é posíbel
modificalo nin procesalo, mentres que con estas novas técnicas o
servidor pode traballar sobre os datos sen necesidade de descifralos,
coñecelos e volver a cifralos”, explica Troncoso, que abre así a
porta a servizos na nube cunha garantía plena de confidencialidade e
privacidade para os usuarios, xa que nin sequera o provedor ten
acceso aos seus datos.
Malia ser unha área de investigación
recente, os investigadores desenvolveron un demostrador que emprega
un esquema de cifrado propio, podendo cifrar calquera tipo de sinais
multidimensionais (audio, imaxes, vídeos, ecografías 4D...) de
maneira moi compacta e procesalas eficientemente no dominio cifrado,
permitindo realizar multitude de operacións (filtrados, busca de
zonas de interese na imaxe, realce de bordes...) de
xeito transparente para o usuario e evitando a necesidade de dispor
dun hardware específico.
Para
rematar cómpre lembrar que nos últimos anos,
a lexislación española e (especialmente a da Unión Europea) está
a avanzar con paso firme cara á provisión de maiores garantías na
protección dos datos persoais en case calquera contexto; con todo,
iso non significa que as aplicacións que a sociedade emprega decote
introduzan os mecanismos tecnolóxicos axeitados para garantir a súa
seguridade e preservar a súa intimidade, especialmente coa rápida
evolución da Internet das Cousas e os fogares conectados.