O web:tv renóvase cunha versión mellorada do seu firmware

O fabricante de electrónica de consumo afincado en Compostela, Blusens, vén de anunciar a dispoñibilidade dunha nova actualización de balde para o seu dispositivo estrela, o web:tv, de xeito que recolle melloras substanciais desenvolvidas durante os pasados meses, depurando o acceso a YouTube, o control dende dispositivos Android ou o seu navegador web (que incorpora soporte parcial de HTML).
O firmware 8643 para o web:tv tamén inclúe o soporte para ficheiros de máis de 1 Gb con contas Premium de Megaupload, mellora a detección, sincronización e renderizado de subtítulos, facilita a reprodución de fluxos de streaming en formato m3u8 dende o navegador, engade os idiomas francés e portugués, amosa a calidade e a potencia das canles de TDT tanto durante a sintonización como ao cambiar de canle... e moitos outros detalles entre os que tamén podemos destacar o soporte completo para o novo Blusens RC02, un accesorio de pequenas dimensións (150 x 60 x 12 milímetros) e pouco peso (90 gramos) que se comunica sen fíos cun receptor USB para facilitar o seu uso en equipos informáticos (e que tamén pode operar en consolas de videoxogos Xbox 360 ou PlayStation 3 e dispositivos Android) facendo de teclado e rato ata a unha distancia de 30 metros.

O Blusens RC2 é un excelente complemento para o uso do web:tv como dispositivo de navegación a través da Internet, podendo aproveitarse para outros dispositivos

Este novo dispositivo conta con 79 teclas retroiluminadas, un panel táctil que fai as funcions de rato, unha batería interna recargable por USB, un deseño ergonómico que facilita o seu uso e xa está á venda por 59 euros na tenda en liña de Blusens, onde tamén podemos encontrar o web:tv a un prezo rebaixado (129 euros), como tamén acontece coa súa versión reducira, o web:tv lite, que pasa venderse a 99 euros (incluíndo de balde un adaptador USB para conectar o dispositivo a unha rede sen fíos e que está valorado en 14,90 euros), o que facilítalle a competencia con outros reprodutores multimedia que hai no mercado.