O último Humble Bundle recada máis dun millón de dólares en dous días

xoves, 21 de xullo do 2016 Marcus Fernández

Hai un par de días 2K Games sorprendeu sumándose unha vez máis á iniciativa solidaria Humble Bundle incluíndo un dos seu grandes xogos da tempada, Battleborn, que está a ter serios problemas para competir con éxito de Overwatch, título semellante que está a eclipsalo, e ante o que podería mellorar posicións entre os xogadores de PC grazas a esta atractiva promoción.
Os usuarios que acheguen a partires de 1 dólar no novo Humble Bundle poderán cos xogos The Darkness II, Spec Ops: The Line e Duke Nukem Forever, tres títulos de primeira fila, que de por si xa compensarían facerse con este lote humilde; mentres que os usuarios que paguen máis da media (8,67 dólares no momento de escribir estas liñas) poderán engadir ao seu catálogo de xogos en Steam o máis que notables Sid Meier’s Civilization V, NBA 2K16 e Mafia II Director’s Cut (xogo que recibirá secuela en outubro), así como un lote de skins para Battleborn e algún xogo máis que se desvelará a semana que vén. Pero a achega que está a resultar máis atractiva é a que parte de 15 dólares, e que inclúe, aparte de todos os xogos antes mencionados, Borderlands: The Pre-Sequel e Battleborn (xunto cun lote de moedas para o xogo).

Éxito instantáneo

Tendo en conta que Battleborn é un xogo que está á venda por 49,99 euros, o feito de poder conseguilo por menos de 14 euros xunto con outros títulos de grande calidade é normal que provocase unha resposta inmediata, e dende esta iniciativa solidaria confirman que xa superaron o millón de dólares recadados coa mesma, cantidade que podería incrementarse considerablemente nos 12 días nos que esta campaña aínda estará vixente.

Dende o Humble Bundle celebran superar a barreira do millón de dólares recadado en menos de 2 días

PUBLICIDADE