O trailer da nova película de Batman bate o record de descargas en iTunes

O fenómeno dos vídeos na Internet está en constante evolución, e aínda que pareza que as secuencias deportivas (como os goles da última xornada), os vídeos musicais ou os clips graciosos (como o gato que se enfronta a un crocodilo) están a captar toda a atención, os trailers cinematográficos resístense a perder pulo, e o feito de que o novo trailer de El Caballero Oscuro: La leyenda renace se estrease na Internet a través de iTunes permitiu levar unha certa contabilidade das súas reproducións, rexistrando 12,5 millóns de descargas a través da páxina web de iTunes e da aplicación para iOS en só 24 horas, o que supón unha nova marca por superar ao trailer de The Avengers publicado en outubro por máis de 2 millóns de descargas.
Cómpre destacar que os 12,5 millóns de descargas só contabilizan as reproducións a través da plataforma de distribución de Apple, de xeito que os millóns de reproducións que tiveron lugar en YouTube non se terían en conta (especialmente pola dificultade de sumar as numerosas copias da peza que figuran actualmente en tal plataforma de vídeo).
A película estrearase en España o vindeiro 26 de xullo e a expectación creada na Rede dá a entender que será unha das principais películas de 2012, tanto na carteleira coma no mercado doméstico.

O trailer da nova película de Christopher Nolan con subtítulos en español