O programa de capacitación tecnolóxica Faite Dixit@l abrangue máis de 160 actividades
luns, 1 de setembro do 2014
O vindeiro 22 de setembro
vaise pór en marcha na nosa terra unha iniciativa de formación e
divulgación para fortalecer a parte do noso currículo que máis
relación ten coas novas tecnoloxías da información. Trátase
de Faite Dixit@l, un itinerario de capacitación tecnolóxica
orientado a ofrecer aos participantes ferramentas e coñecementos que
favorezan a empregabilidade, o emprendemento e a adquisición de
coñecementos e competencias TIC. Detrás deste programa atópase a
Axencia para a Modernización Tecnolóxica de Galicia (AMTEGA) en
colaboración con Academia Postal e Fundetec.
A iniciativa, na que pode
participar calquera (a inscrición ábrese o 5 de setembro nas aulas
CeMIT e na web desta rede),
abrangue máis de 160 actividades de balde ata o mes de decembro.
Segundo explica AMTEGA, superaríanse as 500 horas de duración.
O programa foi presentado
a semana pasada pola directora da Axencia, Mar Pereira, o coordinador
de proxectos de Academia Postal, Miguel Caneda e a xerente de
proxectos de Fundetec, Lourdes Iglesias. Segundo fixeron saber, o
itinerario ofrece como actividades centrais bloques temáticos sobre
a configuración de dispositivos móbiles e a programación de
aplicacións; sobre ferramentas web 2.0 para o desenvolvemento de
contidos especializados no eido da Sociedade da Información e sobre
estratexias de publicidade e mercadotecnia en liña e a súa
aplicación no eido do comercio electrónico e de vendas por
Internet.
Cada unha destas
actividades terá unha duración entre 25 e 30 horas, repartidas en
sesións diarias de 4 horas a través do sistema de videoconferencia
do que dispoñen as aulas CeMIT, e que contarán con edicións de
mañá ou tarde para favorecer a asistencia dos interesados. “Os
contidos destas actividades”, engadiron, “están deseñados para
o proxecto de xeito específico e os usuarios terán a súa
disposición asesoramento para avaliar a súa evolución”.