O portal de inserción laboral da ONCE acubilla xa 4.130 empresas colaboradoras
mércores, 23 de abril do 2014
- Os froitos obtidos polo portal e as últimas novidades introducidas presentáronse esta semana en Madrid
A Fundación ONCE vén de
facer reconto do acadado a través do seu portal Portalento.es,
inserido en FSC Inserta, iniciativa dirixida á xestión de recursos
humanos. Pois ben, segundo informa a organización de persoas
invidentes, un total de 24.429 persoas con diversidades funcionais,
motrices ou cognitivas acadaron un contrato laboral no últimos cinco
anos a través de FSC Inserta, unha boa parte dos contratos levados a
cabo grazas á actividade do dito portal-plataforma de emprego e
formación. Esta web, engade a Fundación ONCE, converteuse xa “en
punto de encontro das ofertas das 4.130 empresas colaboradoras de FSC
Inserta e os máis de 190.000 demandantes inscritos na súa bolsa de
emprego”.
O portal, por certo, está
este días estreando nova feitura e novos contidos. Segundo informa a
Fundación, a ferramenta renóvase “para optimizar todos os
procesos de intermediación e permitir aos seus usuarios interactuar
en liña directa cos expertos da entidade”. O obxectivo disto: que
os usuarios estean ao día da ampla oferta formativa e das
oportunidades de emprego. Aos empresarios, a nova plataforma
ofrécelles recursos como a xestión das súas ofertas en tempo real
e o acceso a información dos candidatos que se axustan ao perfil
requirido.