O Zulo e o Concello de Mugardos organizan este sábado a súa xornada sobre cultura libre
venres, 18 de novembro do 2016
A
Comunidade O Zulo con base en Mugardos e máis o Concello organizan
esta fin de semana, o sábado 19, unha nova edición dos seus
encontros de tecnoloxías abertas, dirixidos a facer fronte común
arredor da importancia de eliminar barreiras para os recursos
informáticos e amosar os moitos beneficios de apostarmos dende todas
as frontes (a nivel persoal, empresarial e institucional) polo
software non privativo. A Xornada
de Software e Cultura Libre é un evento de balde cuxo obxectivo,
en palabras de O Zulo, é “achegar a tecnoloxía a tódalas
franxas de idades, dende os máis pequenos ata maiores”.
Abordaranse múltiples cuestións prácticas relacionadas coa cultura
sen cancelas, dende radio e fotografía a, por suposto, electrónica
e tecnoloxías informáticas.
Nun
plano máis concreto, o programa abrangue as seguintes actividades:
Smartphonografía : Obradoiro de fotografía con teléfonos
móbiles (imparte Xela Rodríguez, de 10.30 a 13.30 horas, na
Biblioteca Pública de Mugardos), Iniciación á electrónica con
Arduino (imparte Rafa Couto, en horario de 10.30 a 13.30 horas,
na Oficina de Información Xuvenil), Podcast e ficcións sonoras
(imparte Jorge Lama, de 16.30 a 19.30 horas, na Biblioteca),
Obradoiro de electrónica básica para cativos (imparte
VermisLab, de 16:30 a 18:30, de novo na Oficina de Información
Xuvenil), Virtualización de contedores Docker en Raspberry Pi para
contornas Drupal (imparten Christian López e Diego Carracedo, a
partir das 12.30 no salón de plenos do consistorio) e Xornada de
traballo comunidadeozulo.org, migración a Drupal 8 (imparten
Javier Cartelle e Alberto Permuy, en horario de 11:00 a 13:00 –
17:00 a 19:00, no salón de plenos do consistorio). Tamén haberá
unha mesa redonda ás 20.00 horas, no salón de plenos do Concello, a
desenvolver baixo o seguinte epígrafe: A tecnoloxía no movemento
asociativo en Mugardos.
Amais
do devandito, outro dos obxectivos destas xornadas é “convidar a
tódalas asociacións de Mugardos para poñer en común o uso e
necesidades da tecnoloxía”. Ademais, tentarase procurar puntos de
encontro para traballar “en vindeiros proxectos comúns”.