O Ministerio de Interior premia a seguridade de Caixa Galicia

A Xefatura Superior de Policía de Galicia vén de concederlle, esta mesma mañá, unha dobre Mención Honorífica de categoría A aos departamentos de Seguridade e Seguridade Informática de Caixa Galicia, a máxima condecoración coa que o Ministerio de Interior distingue aos equipos de seguridade privada que destacan o cumprimento do seu deber.
Este premio, que recoñece publicamente a traxectoria profesional e o esforzo de Caixa Galicia, foille concedido á banca galega por dotarse dun sistema de seguridade de primeiro nivel, que protexe eficazmente tanto a clientes como a empregados e que elimina os riscos que poden afectar ao patrimonio, imaxe e operativa da entidade.
Caixa Galicia, que é a institución financieira con presenza nacional con menor índice de atracos, posúe un modelo de avaliación de risco exclusivo para cada oficina, o que lle permite, segundo informa o seu director de seguridade, Andrés Martín, “medir o nivel de exposición ao risco de atraco de cada un dos empregados e ofrecerlles un protocolo de actuación persoalizado en caso de emerxencia”.
No tocante ao ámbito da seguridade informática, Caixa Galicia caracterízase por “extremar os aspectos relacionados con este tipo de seguridade para os seus clientes” o que se traduciu na primeira banca electrónica de España en obter a certificación de calidade ISO 20000 que certifica que a tecnoloxía da entidade posúe excelentes niveis de fiabilidade, seguridade e calidade.
No ano 2006 Caixa Galicia, que nos últimos anos non recibiu ningún ataque informático, foi a primeira entidade en incorporar o envío ao teléfono móbil da coordenada de acceso aos seus sistemas, o que lle permitiu ser unha das entidades con menor número de fraudes.
Asemade, a incorporación do novo DNI electrónico nos seus sistemas tamén permitiu reforzar, aínda máis, a seguridade ante calquera tipo de fraude fomentando a confianza nas transaccións electrónicas.
Agora Caixa Galicia acaba de obter a certificación de calidade ISO 20000 para todos os seus caixeiros automáticos e reducíu a cero o spam recibido.
Os investimentos en tecnoloxía da caixa galega, que conta con máis de 800 oficinas en todo o mundo, ascenden a preto de 193 millóns de euros, que serviron para mellorar a tecnoloxía propia (equipos, instalacións, redes, proxectos informáticos…) e converterse nunha das plataformas tecnolóxicas máis desenvolvidas de Galicia e España.