O Firefox 4 Beta actualízase con sincronización e a agrupación de pestanas

O navegador web Firefox 4 continúa a avanzar na súa versión de proba, anunciándose estes días que integra Firefox Sync e Firefox Panorama, tecnoloxías que buscan a sincronización entre múltiples dispositivos e revolucionar o uso das pestanas no navegador respectivamente.
Así, dun xeito semellante a como fai o Firefox Home no iPhone, o Firefox 4 Beta incorpora Sync, servizo que fai que os favoritos, o historial, a barra de busca, os contrasinais, os datos introducidos en formularios e as pestanas que teñamos abertas almacénense na nube para poder sincronizar tal información entre múltiples dispositivos, polo que podemos traballar en varios ordenadores ou trebellos móbiles sabendo que conservaremos tal información, o que axilizará o noso uso da Internet e facilitará a vida do usuario.
Pero o cambio máis visible da nova versión de proba do Firefox 4 é, sen dúbida, o Firefox Panorama, xa que está presente coma un botón á dereita das pestanas que teñamos abertas no navegador, e facilita a organización das pestanas abertas en múltiples grupos, de xeito que podemos alternar entre pestanas ou grupos das mesmas tanto de xeito visual como a través de atallos de teclado.

Vídeo no que podemos ver o funcionamento do Firefox Panorama