O Concello de Pontevedra dará acceso á Internet sen fíos nas prazas do seu casco histórico

O Concello de Pontevedra está a preparar unha rede sen fíos que permita o acceso á Internet nas prazas dos seu centro histórico baixo o nome de Pontevedra Conecta, que podería concretarse a curto prazo.
Nunha primeira fase, que conta co financiamento do Fondo Estatal para o Emprego e a Sustentabilidade Local (cun orzamento de 208.800 euros), prevese a conexión dos diferentes edificios municipais a través dunha rede sen fíos, de xeito que ao conectar a Casa Consistorial, o edificio de Michelena, o de Churruchaos e a sede de Turismo de Pontevedra, poderase dar servizo á Internet sen cables nas prazas de España, A Ferrería e A Verdura.
Agora están a estudar cómo será o servizo que ofrecerán aos cidadáns, de xeito que posiblemente dean acceso de balde aos usuarios rexistrados, pero limitando os usos que poden facer da rede, os tempos de conexión e os volumes de descarga. Tamén podería optar por un sistema de pagamento, aínda que non parece moi probable en vista do fracaso que tivo a rede WiMAX establecida en Compostela (que nos seus primeiros meses de vida só captou 2 clientes).
Pero esta non é a única iniciativa tecnolóxica dentro do segundo Plan E, senón que tamén modernizarán a relación administrativa dos cidadáns co Concello, avanzando cara á Administración electrónica, incrementando o número de trámites dispoñibles a través da Rede, para o que conta cunha dotación de 200.000 euros.