O Campus do Mar e Gradiant afondan no potencial do binomio TIC-transporte marítimo
martes, 16 de setembro do 2014
O Campus do Mar e
Gradiant organizan para o vindeiro xoves 25 de setembro un encontro
destinado a avaliar, entre investigadores e entre profesionais da
innovación e do transporte marítimo, o potencial e posibilidades
das novas tecnoloxías da información para acadar unha mellor
xestión e operatividade no traslado de mercadorías a través do
mar. As sesións desenvolveranse no salón de actos da Cidade
Tecnolóxica de Vigo, CITEXVI, entre as 09:00 e as 14:00 horas. En
palabras da organización, o obxectivo é “pór en contacto ao
sector investigador do Campus do Mar co sector industrial para
potenciar o coñecemento mutuo e servir de xerme de posíbeis
colaboracións”. A xornada Transporte
marítimo e loxística sustentábel a través das TIC arranca
ás 9.00 horas coa recepción de asistentes.
A continuación é a
quenda de Nicolás Troncoso, de Kaleiko Ideas & Logistics, que
falará das necesidades e estratexias de innovación no sector do
transporte por mar; Fernando González Laxe, da Universidade da
Coruña, que incidirá en métodos para acadar meirande eficiencia
portuaria; e Stefanos Kokkorikos, R&I Advisor, CERTH, que
afondará na estratexia de innovación en transporte marítimo a
nivel europeo. Ás 11.00 horas está prevista a pausa para o café e
arredor das 11.30 unha rolda de presentación de casos de éxito na
aplicación rendíbel do binomio TIC-Mar. Nesta rolda participan REDE - Universidade de Vigo, a Universidade de Leipzig University, a
Autoridade Portuaria de Vigo, o centro tecnolóxico Gradiant e
Transglobal. A xornada remata sobre as 13.30 cunha quenda de
preguntas e comentarios.