O CPEIG convoca a especialistas de toda España para afondar nas implicacións da ética do Open Data
mércores, 11 de abril do 2012
A filosofía do Open Data (datos abertos) é
semellante ao da cultura libre, unha aplicación ao miolo da Rede da liña ética
que defende que se libere de atrancos o coñecemento. As posibilidades de
usarmos a Internet para crear información accesíbel e para que esta se mova e
chegue a quen non a tivo até o de agora son moitas e variadas, tanto a nivel
social como no eido empresarial. Dar conta delas e debater sobre as súas
implicacións é un dos grandes obxectivos da xornada Open Data, Oportunidades de Transparencia na Era da Información, organizada polo CPEIG e prevista para o 18 de
abril en horario de mañá.
O encontro do Colexio Profesional de Enxeñería en
Informática de Galicia celebrarase no Auditorio
da Biblioteca da Cidade da Cultura, en Santiago de Compostela, en colaboración
coa Axencia
de Modernización de Galicia.
A intención do colexio é xuntar baixo un mesmo
teito e disposición común de diálogo a especialistas galegos e do resto de
España en materia de datos. Xuntos abordarán a filosofía e o potencial do
movemento do Open Data, que como
dixemos avoga por que determinados datos estean
dispoñibles de forma libre a todo o mundo, sen restricións de copyright nin
patentes, ou outros mecanismo de control. Ou sexa, que falamos de ceibar
os datos co fin de promover o seu emprego.
O acceso ás charlas é libre ata completar o aforo.
Inaugurará o encontro a directora de Axencia AMTEGA, Mar Pereira, acompañada
polo presidente do CPEIG, Fernando Súarez Lorenzo.
Segundo informa o colexio, intervirán no encontro o
director de Atención Cidadá do Goberno Vasco, Alberto Ortiz de Zárate Tercero;
o director de Proxectos da empresa galega Bahía Software, Emilio José Díez
Rico; David Cabo, patrono fundador da Fundación Ciudadana Civio, creador de
dondevanmisimpuestos.es e tudrechoasaber.es; María José García Sexto, directora
da Área de Modernización das Administracións Públicas de Amtega, da Xunta de
Galicia; e Carlos de la Fuente García, director de Servizos Tecnolóxicos da
Fundación CTIC. A xornada pecharase cunha mesa redonda sobre os Retos de Futuro do Open Data e a
clausura a cargo do presidente do CPEIG.