O CPEIG celebrou a VII Noite da Enxeñaría en Informática de Galicia salientando o mellor do sector
venres, 26 de xuño do 2015
O Colexio Profesional de Enxeñaría en Informática de Galicia (CPEIG) celebrou hoxe no Hotel-Monumento San
Francisco (Santiago de Compostela) a VII Noite da Enxeñaría en
Informática de Galicia, un acto no que fixo entrega dos premios
anuais e no que se reforza o espírito de
pertenza a un colectivo con demandas e intereses comúns. Unhas 250 persoas
participaron na gala, á que asistiron a conselleira de Sanidade, Rocío
Mosquera, e o conselleiro de Cultura, Educación e Ordenación Universitaria,
Román Rodríguez; autoridades académicas; unha representación do empresariado
TIC e colexiadas e colexiados.
Na súa
alocución aos presentes, o presidente do CPEIG, Fernando Suárez Lorenzo,
subliñou “o compromiso da profesión, claro e irrenunciable, de construír unha
sociedade da información centrada na persoa, inclusiva, e onde todos poidan
crear, acceder, utilizar e compartir a información e o coñecemento para
permitir a persoas, comunidades e pobos acadar o seu pleno potencial”, ao que
engadiu palabras máis reivindicativas ao apuntar que “é chegado o momento de
poñer en valor as capacidades dos profesionais da Enxeñaría en Informática no
nivel corporativo axeitado”.
Suárez Lorenzo afondou nesta idea e manifestou que “as universidades españolas
estiveron formando excelentes enxeñeiros en Informática infrautilizados polas
organizacións, entre outras causas polo caos regulatorio e a falla de
profesionalidade”.
Galardóns
Durante a
gala fíxose acto de entrega dos premios anuais do CPEIG a través do que
distinguen a entidades, persoas e empresas polas súas contribucións á Enxeñaría
en Informática:
· Premio Proxecto
Fin de Carreira: Jesús Peón López, polo proxecto Plataforma de
Identificación Biométrica en Emerxencias Santiarias. Permite identificar os
pacientes que requiren de atención sanitaria empregando sistemas biométricos,
como a pegada dixital e patrón intravenoso dixital.
· Premio
Iniciativa Emprendedora: Teimas Desenvolvemento, empresa de
desenvolvemento software orientada a produto, que leva adiante a súa actividade
no sector ambiental.
· Premio
e-Inclusión: Grupo Promedia, pola súa aposta pola integración, a través das novas tecnoloxías, das persoas con
diferentes problemas da linguaxe.
· Premio
Ada Byron: Eva Dafonte, enxeñeira superior informática
que traballa na actualidade na Organización Europea de Investigación Nuclear
(CERN) en Xenebra.
· Premio Apoio á Iniciativa
Emprendedora: Telefónica Galicia Open
Future, proxecto tractor que,
mediante a convocatoria de emprendedores, impulsa a innovación tecnolóxica en
sectores estratéxicos para Galicia.
· Premio Traxectoria
Profesional:
Benigno Rosón, subdirector xeral de Sistemas e Tecnoloxías da Información do
Servizo Galego de Saúde (SERGAS).
· Premio Iniciativa da
Administración: Colaboración da AMTEGA e a Consellería de Educación na
realización do Estudo sobre os Factores
Influentes na Elección de Estudos Científicos, Tecnolóxicos e Matemáticos.
· Premio Iniciativa
Empresarial: Centro Tecnolóxico de Inditex.
O epicentro tecnolóxico de Inditex conta cunha superficie
construída de 4.000 metros cadrados e está dotado coa última tecnoloxía que
garante a máxima seguridade en termos de fiabilidade da infraestrutura e a
maior eficiencia enerxética posible.
· Colexiado de Honra: Miguel Anxo Ríos
Fernández, presidente da Real Academia Galega das Ciencias, pioneiro en Galicia
no uso da Informática na investigación.
Implicación da Xunta para incentivar as vocacións tecnolóxicas do alumnado
O conselleiro de Cultura, Educación e Ordenación
Universitaria, Román Rodríguez; e a directora da AMTEGA, Mar Pereira,
recolleron hoxe o Premio Iniciativa da Administración, un galardón outorgado
polo Colexio Profesional de Enxeñaría en Informática de Galicia pola
elaboración do Estudo dos Factores
Influentes na Elección de Estudos Tecnolóxicos en Galicia.
Trátase dun documento que permitirá identificar as causas da baixa
matriculación en estudos tecnolóxicos (tan só o 9% dos futuros universitarios
galegos apostan por esta vía) e propoñer, en consecuencia, posibles medidas de
impulso para fomentar o atractivo destas carreiras e difundir as súas diversas
saídas laborais.
Ademais de agradecer o galardón recibido, o conselleiro
Román Rodríguez lembrou o compromiso do Goberno da Xunta coa integración das
TIC nos centros educativos galegos a
través de proxectos como o Abalar, o E-dixgal ou o Plan de Mellora de
Bibliotecas Escolares (PLAMBE), encamiñados a superar a brecha dixital e lograr
a equidade no ensino. Esta aposta polas
TIC tamén se visualiza no investimento de máis de 11 millóns de euros que se
destinará a dixitalizar o 100% das aulas do ensino público de Galicia a
partires de 5º de Primaria.
Pola súa parte, Mar Pereira sinalou que o sector tecnolóxico
é unha das áreas con maior potencial de
emprego a futuro, con máis de 100.000 novos empregos ao ano en Europa. Por iso é preciso coñecer porque máis do 90%
dos futuros universitarios desbotan encamiñar o futuro laboral cara esta área.
Premio á Traxectoria Profesional 2015
Benigno Rosón Calvo,
subdirector xeral de Sistemas e Tecnoloxías da Información da Consellería de
Sanidade, recolleu hoxe, na capital de Galicia, o premio Traxectoria
Profesional 2015, do Colexio Profesional de Enxeñaría en Informática de
Galicia, polo seu decisivo papel no deseño do futuro modelo de sanidade pública
da nosa comunidade. O premio foille entregado pola conselleira de Sanidade,
Rocío Mosquera Álvarez.
O Colexio de
Enxeñaría destaca do galardoado que, dende a súa Subdirección Xeral na
Consellería de Sanidade, desenvolvéronse, nos últimos anos, proxectos de gran
repercusión tecnolóxica e asistencial, como a informatización da historia
clínica electrónica, a implantación da receita electrónica, ou os proxectos
europeos Hospital 2050 e Innova Saúde.
Na súa intervención,
Benigno Rosón agradeceu a distinción á xunta directiva e aos colexiados que
representan. Así mesmo, manifestou o seu orgullo por recibir un recoñecemento
dos seus compañeiros de profesión, “unha profesión nova pero xa con moita
experiencia. Unha profesión eminentemente tecnolóxica pero que, tamén, desenvolve
importantes funcións de planificación estratéxica, dirección e xestión, e que
axuda ás administracións e empresas a seren eficientes”.
Segundo o
subdirector xeral, a enxeñaría informática é unha profesión “que sabe compartir
espazos con outras profesións, e que, especialmente en Galicia, participa en
proxectos de gran valor tanto dende o entorno público como dende o privado”. En
definitiva, -destacou- “unha profesión que co seu traballo e esforzo tenta
facer máis doado o día a día de moitas persoas”.
Benigno Rosón
rematou a súa intervención facendo un recoñecemento a todos os seus compañeiros
de Sanidade, “posto que este premio recoñece o esforzo dun grupo importante de
persoas que cre que, dende o entorno público e aplicando as tecnoloxías da
información, se pode mellorar a calidade de vida e a saúde das persoas”.