O CESGA celebrou o Día das Rapazas nas TIC amosando propostas para equilibrar a balanza de xénero no sector
xoves, 24 de abril do 2014
- As empresarias TIC amosando cadansúas experiencias perante as estudantes galegas de secundaria na xornada celebrada hoxe en Santiago/ Imaxes de Abraham Martínez, CESGA
Por
desgraza o mundo das TIC segue a ser un mundo maioritariamente de
homes. A nivel empresarial as cousas están así e a nivel educativo
a situación tampouco é moi diferente. Unha vez máis, os culpábeis
desta situación somos todos en maior ou menor medida, contribuíndo
á permanencia de estereotipos que non responden a nada, e que
comezan a presentárselles ás nenas e aos nenos dende idades ben
temperás (cóntanse por centos os debuxos animados de máis
audiencia que ofrecen roles femininos machistas e tradicionais).
Dende a iniciativa europea ICT-Go-Girls, coordinada polo Centro de
Supercomputación de Galicia, quérese inverter esta situación. E
como facelo? Pois activando recursos dende a raizame desta
discriminación: o ámbito educativo. Hoxe mesmo celebrouse na sede
do CESGA o Día
Internacional das Rapazas das TIC (Girls
in ICT Day 2014)
e ao abeiro da cita amosáronse múltiples exemplos de ideas
preconcibidas que cómpre derrubar.
A
xornada de celebración, promovida
e coordinada
pola ITU (International Telecommunications Union), encamíñase
a facer visíbel o traballo de mulleres profesionais no eido das TIC,
fomentando vocacións femininas e impulsando a paridade no sector. No
caso da nosa terra, a celebración ten unha importancia especial, en
boa medida porque unha entidade galega, o CESGA, promove e coordina o
proxecto europeo ICT-Go-Girls!, do que abrolla precisamente a
conmemoración das profesionais do ámbito tecnolóxico-dixital. Este
proxecto diríxese a pór de relevo entre as nosas rapazas de
secundaria o potencial profesional dunha formación e dunha
experiencia TIC. De feito, dende o programa saliéntase que se trata
dun dos sectores que amosa arestora
máis
vitalidade á
hora de fornecer contratacións. Sen ir máis lonxe este foi o dato
arredor do que xirou a intervención de Javier García Tobío,
director do CESGA, quen abriu as actividades lembrando que en
referencia ao sector hai 100.000 novos postos de traballo dispoñíbeis
cada ano no eido da Unión Europea, circunstancia de renovación
continua que debemos aproveitar para darlle a volta ás estatísticas
de xénero.
- Mesa inaugural da xornada
No
acto tamén interveu Mar Pereira, directora da Axencia para a
Modernización Tecnolóxica de Galicia, quen se presentou ante a
rapazada reunida no CESGA (fisicamente e a través de
videoconferencia dende diversos centros de secundaria da nosa terra)
como “muller adicada ás TIC”. O seu relatorio comezou expoñendo
a realidade da súa contorna profesional: un departamento da
Administración autonómica que amosa unicamente unha porcentaxe de
mulleres do 25%, cousa que, dixo, tamén é aplicábel á totalidade
do sector galego, en boa medida integrado por homes. Ao seu xuízo,
estanse a facer cousas importantes para cambiar esta situación,
“unha
situación que cómpre mudar xa”,
e a iniciativa ICT-Go-Girls! é un bo exemplo diso. Asemade, informou
que o compromiso de loitar contra as fendas de xénero nas novas
tecnoloxías é un dos grandes cometidos de AMTEGA, un labor que
en parte fundaméntase baixo a seguinte mensaxe: “O sector TIC é
un sector cheo de posibilidades para as mulleres”. Ao
tempo, díxolles
ás estudantes que se trata dun traballo de tipo creativo e con
capacidade para mudar as cousas que nos rodean, para mellorar a
calidade de vida da xente, alicientes de abondo como para teren
en conta este tipo de profesión. Ao mesmo tempo, avogou por desbotar
definitivamente a idea de que adicarnos ás TIC implica
necesariamente “estarmos
pechadas” nun laboratorio de desenvolvemento, xa que cada vez está
máis claro que a realidade é ben distinta, e que poucas profesións
hai que teñan tanto contacto coa realidade quen os rodea coma a
tecnolóxico-dixital.
Na
xornada de celebración tamén participou María José R. Malmierca,
responsábel do
Departamento de e-learning e ferramentas colaborativas do CESGA, quen
fixo un repaso polos obxectivos de ICT-Go-Girls e, máis polo miúdo,
polas cousas que se están a facer dende a dita iniciativa para
localizar a raizame do problema, atallala e pór en marcha medidas
que equilibren a balanza de xénero no eido TIC. Malmierca lanzoulles
ás presentes a seguinte pregunta: Como é posíbel que non haxa máis
mulleres neste ámbito? Segundo explicou, respostas a esta cuestión
hai moitas, pero en base aos estudos feitos polo proxecto europeo
cómpre salientar unha serie de culpábeis
ben
concretos e definidos. Por unha banda a formación, que falla na
presentación das posibilidades das TIC e en motivar ás nosas
rapazas cara unha carreira de tipo tecnolóxico. Asemade, tamén hai
moito que facer en materia de visualizar e amosar os éxitos dunha
chea de mulleres, os cambios e importantes transformacións sociais
que as novas tecnoloxías poñen en xogo, a localización dos
estereotipos e a necesidade de ensinar a desconfiar deles
(estereotipos dos que están inzados todo tipo de programas de TV de
meirande audiencia, series, libros e películas). Malmierca lembrou
que dende o proxecto europeo quérese mellorar basicamente a cultura
TIC, as destrezas e os recursos nas aulas. Por este motivo, recordou
que se está a traballar directamente con dous centros educativos
galegos (CPI O Cruce de Cerceda e IES Rosalía de Santiago) para logo
estender os logros xerados ao noso ensino en xeral.
A
conmemoración das mulleres nas TIC celebrada no CESGA rematou cunha
máis que interesante exposición de casos de éxito de emprendemento
feminino tecnolóxico-dixital, emprendemento
ademais galego,
abríndose logo dos diferentes
relatorios unha rolda de preguntas e respostas cos centros formativos
participantes. A idea básica foi
contribuír a normalizar
a opción de traballar nas TIC como unha posibilidade
a ter moi en conta entre as estudantes galegas, quitándolle ferro e
desmentindo falsas crenzas.
Como por exemplo que o ámbito
técnico debe ser cousa de homes. Nesta liña movéronse todas as
participantes, dende Alba Souto (co-fundadora de Bampifu,
unha innovadora marca de roupa para bebés que se sustenta no uso
integral das novas tecnoloxías da información, tanto para o deseño
e a promoción como para a comunicación interna e externa, como
tamén para o acceso aos traballos en marcha, que están na nube) a
Cristina
Gamallo (socia fundadora de SITUM,
unha nova firma que se dedica a comercializar unha ferramenta que
facilita as nosas visitas a determinados espazos pechados, empregando
GPS de interiores e aplicándose a unha chea de ámbitos, evitando co
axuda do noso móbil que nos extraviemos en edificios de grandes
dimensións, tipo centro comercial). En semellantes termos de
reivindicación das TIC entre as mulleres expresouse Susana Ladra,
vicedecana de Organización Académica da Facultade de Informática
da Universidade da Coruña, quen se amosou convencida do
descoñecemento xeral que hai, aínda a día de hoxe, da profesión
que representa. Ao seu xuízo, ser informática é ser unha persoa
que deseña solucións para o día a día das demais persoas, nin
máis nin menos. Solucións persoais que nos axuden a estar máis
comunicados e informados e tamén para as empresas. Na súa opinión,
está claro que en informática precisas en boa medida entender ao
resto da xente, “e coido que as mulleres somos quen de facer iso
especialmente ben”, sinalou. E engadiu: “Os que practican este
tipo de traballo non son frikis
encerrados
todo o día en espazos pechados”.
Por
último, rematou a rolda de exposicións Ángeles Pariente, xerente
do Laboratorio de
Ideas A2, que achegou o punto de vista de “traballadora con
formación de letras traballando no ámbito informático”, amosando
ao mesmo tempo a súa experiencia de coñecemento da Rede, que
comezou avaliando webs cando estas aínda non eran máis que simples
tarxetas de visita e descubrindo máis tarde, ao longo dos anos
recentes, as múltiples posibilidades de comunicación que levaban
dentro das páxinas en Internet e as redes sociais. Sinalou tamén
que en contra do que se pode pensar, non é preciso que teñamos
formación estritamente tecnolóxica para adicarnos ás TIC, e que
hai moito que facer para unha persoa de letras
ao
abeiro da Sociedade da Información.
Participantes
na celebración
·
CESGA (Coordinador do Proxecto ICT-Go-Girls!)
·
Secretaría Xeral Igualdade (Colaborador Proxecto ICT-Go-Girls!)
·
Consellería de Educación (Colaborador Proxecto ICT-Go-Girls!)
·
USC (Participante Proxecto ICT-Go-Girls!)
·
AMTEGA – Unidade Muller e Ciencia-
·
Colexio Profesional de Enxeñería Informática de Galicia (CPEIG)
·
13 Centros de ensino interesados (entre os que están os dous centros
piloto proxecto involucrados ICT-Go-Girls: CPI O Cruce (Cerceda, A
Coruña), IES Rosalía (Santiago de Compostela).