O 90% das grandes firmas estatais acubilla datos escuros
martes, 3 de marzo do 2015
As firmas CommVault e IDC
realizaron en febreiro unha enquisa sobre xestión da información na
gran empresa en España. Entre as conclusións que abrollan do seu
traballo conxunto, fan saber que a gran maioría das grandes empresas
estatais recoñecen acubillar datos escuros, é dicir, información
con poucas ou nulas características de visibilidade e
accesibilidade, tanto para os traballadores como por suposto para
xente allea. Falamos, segundo se apunta na investigación, do 90% das
grandes compañías. Ademais, máis do 40% limita o acceso aos datos
desde dispositivos portátiles e o 20% di non dar acceso absoluto en
mobilidade aos datos da empresa.
As devanditas
conclusións, segundo explican os responsábeis do estudo, poñen de
manifesto unha das grandes contradicións do noso tempo en materia de
coñecemento empresarial: malia a importancia dos datos para os
negocios (son un activo esencial ben sexa para pechar unha
transacción en tempo real, ben para colaborar ou innovar), non
sempre é doado acceder aos mesmos, “debido sobre todo á crecente
complexidade das contornas empresariais e ao reto engadido das
normativas internas das empresas, que moitas veces limitan este
acceso, especialmente no caso dos traballadores móbiles”.
Outra das conclusións da
enquisa fai referencia á gran heteroxeneidade das contornas
empresariais, que organizan os seus datos ao redor de silos
departamentais, con múltiples donos dos datos e múltiples
ferramentas para os mesmos. Así, máis do 30% das empresas
participantes asegura contar con máis de 5 ferramentas para
xestionar a súa contorna de datos, e case o 50% di contar con entre
2 e 5 ferramentas.
No caso de empresas
multinacionais, engádese, a complexidade multiplícase. Así, “a
subsidiaria de cada país pode ter diferentes ferramentas, en
particular cando se trata dunha empresa adquirida, os colaboradores
externos teñen as súas propias ferramentas e cada país pode
favorecer o uso de determinadas ferramentas, ou limitar o uso doutras
por razóns de uso, herdanza tecnolóxica, ou mesmo políticas”,
explícase. Por certo que arredor do 65% das empresas enquisadas
recoñece tardar entre 1 e 3 días en obter resposta ante unha
solicitude de información.