Nokia Siemens Networks adquire parte do negocio de infraestruturas móbiles de Motorola

Nokia Siemens Networks anunciou que chegou a un acordo con Motorola para a adquisición do seu negocio de infraestruturas de redes móbiles por un importe de 1.200 millóns de dólares (927,78 millóns de euros), que se satisfará en efectivo, e que debería facerse efectiva antes de rematar o presente ano, estando suxeita a operación á aprobación dos entes regulatorios.
Esta adquisición reforzará o papel que Nokia Siemens xoga con máis de 50 operadores coma China Mobile, Clearwire, KDDI, Sprint, Verizon Wireless e Vodafone, á vez que Motorola conservará o seu negocio de redes iDEN.
A división adquirida pola alianza entre Nokia e Siemens subministra produtos e servizos para redes móbiles coma GSM, CDMA, WCDMA, WiMAX e LTE e conta con 7.500 empregados que serán transferidos na operación de adquisición.