Nace ProKubo, plataforma online gratuíta que fomenta a contratación de traballadores independentes
martes, 23 de xuño do 2015
Os días pasados púxose
en marcha no ámbito estatal unha plataforma en liña e de balde que
se dirixe a facer unión entre traballadores independentes e pequenas
e medianas empresas. Chámase ProKubo,
e quere dar servizo, sobre todo, a profesionais freelance dos
ámbitos da comunicación, a mercadotecnia, a creatividade e o
deseño. Segundo lembran os responsábeis da plataforma con respecto
á nosa terra, en Galicia existe un importante mercado potencial para
a súa iniciativa: de feito hai unhas 200.000 persoas afiliadas no
devandito réxime na nosa terra, aproximadamente o 7% do total
estatal.
Os impulsores do servizo
son Ricardo Marques, Hugo Ortiz e Tiago Coelho, cuxos obxectivos son
“mellorar as oportunidades de emprego no sector independente,
promover unha contratación baseada na calidade e garantir a
seguridade nos pagos”. E engaden: “A través da plataforma,
fornecemos ás PEME, sobre todo ás de recente creación, dos
profesionais máis acaidos para dar forma a unha identidade
corporativa axeitada ou para presentar produtos e servizos da mellor
maneira posíbel”. ProKubo, neste senso, axiliza a contratación
dese tipo de profesionais, “un amplo colectivo de expertos
especializados que están en disposición de achegar os seus
coñecementos a calquera empresa ou proxecto”.
ProKubo, engaden, “é
unha comunidade de talento que nace para cubrir a necesidade que
teñen miles de empresas, emprendedores e particulares, de atopar a
bos profesionais do sector creativo para mellorar a visibilidade dos
seus negocios”.
A plataforma é de uso
gratuíto tanto para profesionais como para empresas. Os
freelancers poderán crearse unha conta a través da que amosar
as súas capacidades, carteira de servizos e opinións de clientes.
ProKubo permite que as empresas visiten estes perfís, avalíen o seu
traballo e elixan o profesional máis axeitado para o proxecto que
necesiten levar a cabo. A través dun formulario, as empresas poderán
establecer un orzamento ou fixar un prazo para o remate do traballo.
“A plataforma”, explican os seus creadores, “actúa de
intermediaria entre os dous desde o principio até o final do
proxecto, exercendo como ferramenta de comunicación e intercambio de
arquivos e garantindo a seguridade dos pagos”. Isto conséguese
grazas ao sistema Safepay, mediante o cal a empresa que contrata os
servizos dun profesional fai un depósito de garantía na conta de
ProKubo polo importe do custe do proxecto antes do seu
desenvolvemento. Unha vez que o traballo se entrega de acordo ao
estipulado, céibase o depósito.