Megaupload denuncia a France Telécom de limitar a velocidade de acceso ao seu servizo

Cada poucos meses en distintos foros web emerxen discusións acusando a provedores de servizo de Internet de limitar a velocidade a certas páxinas web de descarga ou a aplicacións de intercambio de arquivos, e aínda que os usuarios ilustran as súas acusacións con multitude de probas (como a que asegura que Movistar capa as descargas dende Megaupload), os ISP continúan a negar que limiten as súas conexións (posiblemente para evitar a fuxida de clientes) pero o popular servizo de almacenamento de arquivos Megaupload vén de escribir un novo capítulo nesta historia ao acusar dende a súa web a Orange deste tipo de prácticas.
Cando un usuario de Orange en Francia accede a Megaupload/Megavideo atopa unha mensaxe na que aseguran que no caso de atopar problemas na conexión, podería ser debido a que o seu acceso está a ser limitado intencionadamente, engadindo que segundo as súas estatísticas rexistran problemas de acceso por parte de usuarios que se conectan a través da rede de France Telécom (o que incluiría tanto a Orange como á española Ya.com). Dende Megaupload recomendan aos afectados a presionar á compañía ameazando con abandonala de non remediarse a situación, e incluso aseguran que competidores coma Iliad (free.fr e Alice) ou SFR dan un servizo sen limitacións, polo que cambiando de operador de Internet soluciónase o problema de vez.
Dende France Telecom declaran estar «moi sorprendidos» polas acusacións de Megaupload, pero nunha entrevista a Bonnie Lam, voceiro de Megaupload, France Telécom, asegura que o operador francés ten unha infraestrutura deficiente, que non é capaz de garantir unha boa conexión co seu provedor de servizo, Cogent, que xestiona o 20% do tráfico da Internet, de xeito que os problemas de acceso que tería Megaupload afectarían a preto da quinta parte da web.
O caso francés está especialmente de actualidade porque dende a entrada en vigor da lei HADOPI, que permite o corte da conexión aos usuarios que descarguen contidos protexidos por dereitos de autor sen a pertinente autorización, disparouse o tráfico das páxinas web de descarga directa, como un método de pasar por debaixo do radar dos organismos que vixían o intercambio de arquivos na Rede.
Lembremos que os servizos coma Megaupload e Rapidshare están considerados totalmente legais (como vén de ratificarse nos EE.UU.) pois teñen mecanismos para a eliminación de contidos protexidos por dereitos de autor coma tamén fai YouTube, e incluso consideran difamatorio que os acusen de promover a piratería.