Medran considerablemente as conexións que superan os 20 Mbps en España

Actualmente en España, malia que podemos presumir de ser boísimos xogando ao tenis, de ser os mellores do mundo niso que chamamos fútbol ou de estar entre os primeiros encestando o balón nunha canastra, o certo é que estamos á cola dos países desenvolvidos en materia tecnolóxica, pagando moito por servizos mediocres e estando atados de mans cando as grandes compañías nos “estafan” sutilmente de xeito legal.
E é que, tal e como explican maxistralmente no diario dixital Cincodias.com, “hai dous parámetros que delimitan claramente unha e outra vez a fenda tecnolóxica que separa a España da maioría dos países subdesenvolvidos: os prezos e as velocidades de navegación”; os prezos son por norma xeral abusivos, e de feito o noso é o país cos prezos máis altos de Europa, e as velocidades de navegación son máis lentas que o que deberían tendo en conta o prezo que pagamos polo servizo.
Porén as cousas están a mudar paseniñamente, e pouco a pouco a situación semella estar mellorando, xa que segundo o último informe da Comisión do Mercado das Telecomunicacións (CMT) sobre o sector no segundo trimestre do ano, o número de internautas que navega a velocidades superiores aos 20 Mbps, por primeira vez, ao medio millón; e os prezos da telefonía baixaron ata situarse en mínimos históricos.
Tanto é así que, segundo o informe, na factura do móbil neste trimestre pagamos de media un 10, 85 por cento menos que hai un ano, e un 3,5 menos que no primeiro trimestre deste exercicio, algo propiciado, entre outras cousas, pola aparición de novos operadores móbiles virtuais e a caída xeral de prezos.
No tocante aos prezos polo servizo de Internet, teremos que agardar unhas semanas para que a CMT os faga públicos, porén podemos contentarnos con saber, entrementres, que as velocidades do servizo van subindo de xeito paulatino, e así, mentres que hai un ano só 35.000 persoas tiñan un acceso superior aos 20 Mbps, o informe indica que neste trimestre xa son 561.582 os cidadáns que poden gozar de velocidades superiores a esa cifra sen ter que ir ao estranxeiro.