Lugo Monumental lanza unha web para axudar á veciñanza a atopar o seu agasallo ideal
mércores, 17 de decembro do 2014
A Asociación Lugo
Monumental vén de reforzar a súa campaña de promoción de Nadal
(unha campaña a prol dos comerciantes da cidade vella) cunha páxina
web encamiñada a axudar aos veciños a atoparen o seu agasallo máis
axeitado e acaido para estas festas. Trátase de
envueltopararegalo.com,
unha web desenvolvida por Galicia
Dixital, empresa de deseño na Rede afiliada a Lugo Monumental. A
páxina pon a disposición dos usuarios todo tipo de suxestións para
regalos que abranguen un amplo abano de ideas e produtos: dende
xoiaría até produtos de alimentación, pasando por ceas de Fin de
Ano, viaxes, axudas para os máis maiores, etc.
A web recolle categorías
por prezos e grupos para facer máis doada a procura de galanos. Un
dos obxectivos dos responsábeis da iniciativa foi o de ir alén do
feixe de recursos e dar cabida, tamén, a presentes “pouco
habituais nestas datas do Nadal”. Segundo engaden dende Lugo
Monumental, “non se trata dunha web de compras, ou unha tenda
virtual, senón dun lugar onde atoparmos ideas que se poden ver
fisicamente e adquirir nos establecementos asociados”. A páxina,
como dixemos, foi posíbel grazas á colaboración desinteresada de
Galicia Dixital, que en palabras da dita asociación “fixo un gran
esforzo poñendo os medios principais para que o proxecto se
convertera nunha realidade”.