Lanzada unha aplicación para votar e opinar sobre as propostas dos políticos a tempo continuo
martes, 2 de setembro do 2014
A recuperación do
concepto de cidadanía activa e participativa impulsado a través das
redes sociais e outros instrumentos de comunicación deu como
resultado diversas agrupacións sociais e políticas que en certa
medida adaptaron estas fórmulas colectivas á vida real, fórmulas
por outro lado que viñan de antigo. Falamos de agrupacións como os
Piratas ou en certa medida Podemos. Agora, a tecnoloxía segue a
preparar o camiño deste novo xeito de facer as cousas, onde cada
cuestión é susceptíbel de ser valorada por todas e todos. E faino
(preparar o camiño) con ferramentas como Votando, que se presentou a
finais de agosto como “a primeira aplicación española e de balde,
dispoñíbel en Android, iOS e tamén web, que permite aos cidadáns
informarse e votar de forma virtual sobre os asuntos e propostas que
se tratan no Congreso dos Deputados”.
A aplicación, engaden os
seus responsábeis, favorece a existencia dunha democracia continua
en España amosando en tempo real a información dos votos emitidos,
a través de gráficos que ilustran a opinión dos españois sobre as
iniciativas e propostas actuais, permitindo saber como resulta a nosa
opinión respecto da do resto dos votantes. Votando constitúe polo
tanto unha ferramenta de voto dixital, que ademais (engaden os seus
impulsores) ten a vantaxe de ser “apolítica, transparente,
informativa, non mercantilista, sinxela de utilizar e de carácter
anónimo”. Por certo que o anonimato vén dado polo seguinte: a
aplicación está deseñada de xeito que non sexa posíbel baixo
ningún concepto establecer unha relación entre votante e voto
expreso.
Os seus creadores, amais
do devandito, tamén queren salientar o labor divulgativo da súa
ferramenta. Nas súas palabras, Votando é quen de “facilitar a
comprensión e información do debate político e social, aumentando
con iso o sentido crítico do cidadán”. E engaden: “Tamén
reflicte de forma gráfica o pensamento dos que aquí participan de
maneira instantánea, colaborando no respecto cara ao pensamento
maioritario”.
Detrás desta aplicación
atópase un equipo coordinado por Margarita Rodríguez Ibáñez,
creadora da ferramenta, que explica que Votando non é en absoluto
unha empresa, só un grupo de “persoas apolíticas, independentes e
imparciais que entenden que a sociedade precisa de ferramentas que
favorezan a expresión de opinións dunha maneira transparente e
sinxela, e onde se posibilite emitir un voto sobre os temas que se
debaten no noso ámbito político, social e cultural”. O recurso
está xa accesíbel desde www.votando.es
e dispoñíbel en Google
Play e App
Store.