Lalín publica a web do seu repositorio de software

martes, 19 de abril do 2016 Redacción

Seguimos a falar de iniciativas galegas de impulso ao software libre: actividades para amosar ante a cidadanía as vantaxes de apostar pola programación aberta, cursos, obradoiros, eventos e laboratorios. Logo de dar conta de LibreTeo e máis do vindeiro hackathon dos GPUL Labs, agora é a quenda da importante iniciativa open source que vén de levar a cabo o Concello de Lalín a través da Concellería de Novas Tecnoloxías (ao abeiro do seu compromiso coa comunidade de usuarios e desenvolvedores de software libre). Segundo informa a Concellería, vén de publicar a web do seu repositorio de software, concellolalin.github.io. Neste espazo, sinala o Concello, estarán dispoñíbeis os desenvolvementos do departamento local de Informática para que poidan ser reaproveitados por outras administracións, empresas ou particulares “sen ningún tipo de custe”.
A iniciativa foi presentada este martes polo concelleiro responsábel desta área, Tomás Vilariño, que dixo que “tralas aplicacións de tratamento de enquisas da Feira do Cocido, do Directorio de Empresas, agora ponse a disposición da cidadanía o código fonte dos dous desenvolvementos”.
A plataforma empregada para aloxar o código fonte é GitHub, que é segundo Vilariño “a máis empregada na actualidade polos proxectos de software libre”. En opinión do Concello, está claro que “grazas á programación aberta e aos esforzos do departamento de Informática”, estanse reducindo custes e optimizando os procesos de traballo diario no concello. En termos concretos, aparte dos desenvolvementos propios, o equipo local de Informática tamén fai uso de solucións en software libre no seu día a día, por exemplo Open Broadcaster Software (para a retransmisión das sesións plenarias, GLPI (para o inventariado e incidencias do equipamento informático), Wordpress (para as webs de Feira do Cocido, Roteiros e a intranet corporativa), Mediawiki (para manter a documentación dos distintos traballos), Libreoffice e Thunderbird (como ferramentas ofimáticas en todos os equipos) e Drupal.org (na web institucional lalin.gal)
Tomás Vilariño engadiu que “a estratexia de uso de software libre fronte ao privativo dá un valor engadido ao tecido TIC (Tecnoloxías da Información e a Comunicación) local, que poderá integrar as súas solucións e beneficiarse dos desenvolvementos liberados podendo melloralos e revendelos”.

PUBLICIDADE