Indra, Telefónica e as galegas Televés e Balidea darán forma ao Fogar Dixital da Consellería de Sanidade
martes, 22 de xullo do 2014
A Consellería
de Sanidade anunciou
a adxudicación
do subproxecto Fogar Dixital á coalición
empresarial (UTE)
integrada por Indra e Telefónica.
Segundo informou o departamento da Xunta,
“este subproxecto permitirá crear unha
canle de acceso aos servizos sanitarios para os pacientes e os seus
coidadores”. Ademais, ten como obxectivo dar forma a
produtos e servizos innovadores, dispositivos e sistemas de
información intelixentes “que soporten a comunicación de
información sanitaria orientada á vixilancia e seguimento de
patoloxías”. Neste senso, a tecnoloxía
orientarase a achegar a atención a doentes de carácter crónico,
aínda que tamén se deixan vieiros abertos para fomentar a
prevención.
O sistema
que se desenvolverá, en palabras da
Consellería, “posibilitará dispor dunha
canle bidireccional de comunicación entre o servizo de saúde e o
paciente para enviar a este os recordatorios de autocoidados e boas
prácticas que debe seguir para o coidado da súa doenza”.
Igualmente fornecerá canles áxiles para
que os facultativos e coidadores obteñan información útil das súa
saúde –presión arterial, temperatura,
peso, pulso, glicosa, etc.- e facilitar
desta maneira o servizo se seguimento.
Lembrar que o
proxecto InnovaSaúde, no que se enmarca Fogar Dixital, consta de 14
subproxectos de innovación que teñen por obxectivo xerar solucións
para novos modelos de atención sanitaria cada vez máis centrados no
paciente e nas súas necesidades. Na UTE formada por Indra e
Telefónica participan tamén as empresas galegas Televés S.A. e
Balidea Consuting and Programming S.L.