IBM salienta que a compostelá SetPay empregue a súa tecnoloxía cloud
xoves, 29 de setembro do 2016
- Angel Moreu (IBM), Sam Lown (Cabify) e Xoán González (SetPay)
IBM anunciou que a empresa galega
de pagamentos SetPay elixiu a tecnoloxía cloud
de IBM para o desenvolvemento de novas tecnoloxías ligadas aos pagamentos con tarxetas
bancarias. O seu produto estrela é un TPV móbil que permite a comerciantes
e autónomos xestionar os seus pagamentos dende calquera localización mediante smartphone
ou tableta e un pequeno lector.
O cobro con tarxetas é
unha área tradicionalmente ocupada polos bancos que está a recibir a chegada de
novas empresas grazas a tecnoloxías como a computación na nube, dentro do
fenómeno que se veu a denominar FinTech. A proposta de SetPay consiste en que o
dono dun pequeno comercio só precise dunha aplicación instalada na súa tableta
e un lector conectado por tecnoloxía Bluetooth para realizar cobros con tarxeta
onde queira e cando queira.
A tecnoloxía cloud de IBM facilitou á empresa SetPay,
con sede en Santiago de Compostela, incorporar rapidamente novas
funcionalidades á plataforma. A súa idea é seguir desenvolvendo funcionalidades
e mesmo integrar a aplicación con outros sistemas, por exemplo, a xestión de
inventario.
En palabras da súa CTO Xoán
González, “a tecnoloxía na nube de IBM permítenos ensaiar e probar as nosas
ideas de negocio de xeito doado e económico ademais de contar coa tranquilidade
do autoescalado en momentos de alta demanda do servizo”.
A solución, moi adecuada
para negocios en mobilidade, dispón dun sistema de información detallada sobre
todos os ingresos, cancelacións e reembolsos. A empresa lanzou hai algúns meses
a súa pasarela de pago online, preparada para a integración coas principais
plataformas e-commerce como PrestaShop ou WooCommerce, na que ademais se poden
vincular os cobros a través do seu TPV, unificando así a xestión de todos as
vendas vía tarxeta bancaria dunha empresa nunha mesma solución.
“SetPay comezou a traballar
connosco grazas ao programa IBM
Global Entrepreneur e elixiu IBM Bluemix como plataforma tecnolóxica na
nube para desenvolver os seus servizos. Unha vez finalizados os doce meses do
programa, decidiu quedar connosco polo que lle achega tecnicamente a solución,
o que confirma que a nube de IBM axuda aos emprendedores españois a sacar
adiante as súas ideas”, explica Angel Moreu, directora de cloud en IBM España, Portugal, Grecia e Israel.
A plataforma como servizo
na nube de IBM, Bluemix, axústase rapidamente ás necesidades dos clientes e
permite aos desenvolvedores mesturar e combinar distintos servizos e
ferramentas de aplicacións capaces de operar entre si. Bluemix ofrece aos desenvolvedores
a potencia que necesitan sen ter que reconfigurar a infraestrutura.