Habilitado un plan para dixitalizar o posto de traballo dos empregados públicos galegos
xoves, 22 de xaneiro do 2015
Na
rolda de prensa do Consello do Goberno galego, levada a cabo esta
mañá, aprobábase
o
Plan de dotación e xestión sostíbel do posto de traballo,
proposta que persegue acadar unha xestión dixital de todo o ciclo de
vida dos documentos e procedementos administrativos. Con esta
iniciativa, que se atopa inserida no proceso da eAdministración,
prevese
a posta en marcha de medidas que van dende a formación en novas
tecnoloxías na EGAP até a dotación de medios TIC adaptados a novas
necesidades.
Para
isto cóntase cun
investimento inicial de 4,2 millóns de euros co que, segundo o
presidente Alberto Núñez Feijóo, renovarase o equipamento de
computadores, acadarase a homoxeneización do software e a
centralización das ferramentas de xestión dos equipamentos,
aforrando a Administración 1,2 millóns de euros anuais, “ao que
hai que sumar un aforro doutros 350.000 euros derivado da compra
centralizada de equipamento”.
No
eido do novo equipamento, o plan prevé a renovación inicial do 25%
dos ordenadores da Administración autonómica (arredor de 3.200
computadores). Un total de 2.000 son renovacións de ordenadores en
edificios administrativos e aulas de centros de formación
xestionados pola Xunta; outros 1.200 ordenadores para centros
públicos da área de benestar; 300 equipos de escaneado nas oficinas
de rexistro; introdución dunha rede de videoconferencias en 9 salóns
principais nas delegacións da Xunta, outros 13 equipos para salas e
33 máis portátiles para usos múltiples.
En
canto ao software, comezarase co plan de migración a software libre
en 500 postos de usuario e habilitarase un catálogo con software
corporativo adaptado a cada posto de traballo, garantindo a
sustentabilidade do modelo, a calidade no soporte aos usuarios e a
súa xestión.
Sinalar
que o plan tamén prevé a introdución dunha ferramenta de xestión
integral dos postos de traballo, que permita a distribución masiva
de software, o control remoto dos postos de traballo e dispoñer dun
inventario automatizado.