HP contrata a 15 persoas con discapacidade mediante un acordo coa Fundación ONCE
luns, 28 de xullo do 2014
A
compañía informática HP vén de asinar un acordo coa Fundación
ONCE polo que compromete a incorporar a 15 persoas con diversidades
funcionais ou cognitivas durante os vindeiros tres anos no persoal da
compañía tecnolóxica máis grande do mundo. O dito pacto -coñecido
como Convenio Inserta- foi subscrito pola presidenta de HP para
España e Portugal, Helena Ferreiro, e o vicepresidente executivo de
Fundación ONCE, Alberto Durán, forma parte das accións que está a
desenvolver Fundación ONCE no marco do Programa
Por Talento para a formación e o
emprego das persoas con discapacidade, coa co-financiamento do Fondo
Social Europeo.
FSC Inserta, entidade
para a formación e o emprego de Fundación ONCE, ten a misión de
executar o Programa Por Talento, un instrumento que conta coa
cofinanciación do Fondo Social Europeo (FSE). Este ambicioso
proxecto está enmarcado no Programa Operativo de Loita contra a
Discriminación 2007-2013, e constitúe un novo pulo a prol da
integración sociolaboral do sector da discapacidade e da igualdade
de oportunidades.
Alberto Durán subliñaba
que “este acordo, ademais de supor unha oportunidade para achegar
persoas con discapacidade á contorna laboral de HP, tamén o é para
arbitrar solucións tecnolóxicas e ofertas nas que poidamos combinar
algunhas das ferramentas que temos coas de HP, que son moitísimas
máis”.
Cómpre dicir que ambas
as entidades colaboran desde hai moitos anos para promover a
inserción laboral das persoas con discapacidade. En 2013, HP
asinaba un acordo coa Fundación ONCE polo que, amais de favorecer a
incorporación directa ao mercado laboral deste colectivo, colaboraba
con empresas do Grupo Fundosa na distribución de equipamento
informático e servizos tecnolóxicos, así como na adquisición de
bens e a contratación de servizos a centros especiais de emprego.
Engadir que coa sinatura
deste convenio HP participa no Plan Non te Rendas Nunca, unha
iniciativa de Fundación ONCE para fomentar o emprego entre os mozos
con discapacidade.