Gradiant intercambia coñecemento co Centro Aeroespacial Alemán
martes, 22 de xullo do 2014
O Proxecto LIFTGATE
(Lifting Up the Research Potential of the Galician Telecomms
Center), financiado pola Comisión Europea a través do seu
sétimo Programa Marco, continúa vivo e achegando frutíferos
intercambios de profesionais da investigación con entidades de
primeira liña do ámbito europeo da Investigación e o
Desenvolvemento (I+D). Ao abeiro desta iniciativa de enriquecemento
colectivo, encamiñada nun plano específico a aumentar a
competitividade do centro Gradiant
como centro tecnolóxico a nivel europeo, abórdanse de cheo
cuestións como a seguridade multimedia ou as comunicacións por
satélite. Estas son, de feito, a columna vertebral dos
máis recentes intercambios xerados entre Gradiant e o Instituto de
Comunicación e Navegación do Centro Aeroespacial Alemán.
O Centro Aeroespacial
Alemán (comunmente coñecido como DLR - Deutsches Zentrum für
Luft-und Raumfahrt) é un centro de investigación de gran renome
internacional cunha longa traxectoria de logros científicos no
ámbito aeroespacial nos últimos 45 anos. O centro galego Gradiant
realizou unha serie de comisións de servizo de persoal con DLR nos
últimos meses co propósito de “intercambiar coñecementos no
deseño de sistemas de transmisión de nova xeración para as
comunicacións por satélite”. Segundo informa Gradiant, o que se
fixo en primeiro lugar foi planificar e desenvolver a estadía do
investigador Gabriele Boccolini, que desempeña o seu labor no centro
galego, no Departamento de Redes de Satélites (SAN ) do Instituto de
Comunicación e Navegación de DLR. En correspondencia, Gradiant
acolleu a un investigador de SAN, Svilen Dimitrov, durante unha
estancia de 4 semanas en marzo. Esta serie de comisións de servizo
de persoal rematou a mediados deste mes de xullo tras unha estadía
de tres semanas do director do Departamento SAN da DLR, nas
instalacións do complexo tecnolóxico vigués.
“A través dunha serie
de reunións de traballo e charlas técnicas”, informou Gradiant ao
respecto deste intercambio profesional en concreto, “tivemos a
oportunidade de familiarizarnos cos esforzos recentes da
investigación sobre as comunicacións por satélite de nova xeración
dirixida polo Departamento SAN en DLR”. E engade: “Os beneficios
das comisións de servizo de persoal que teñen lugar ao abeiro de
LIFTGATE non só son de natureza técnica (mellorar a experiencia e o
coñecemento de Gradiant en temas específicos de investigación),
senón tamén de carácter institucional, xa que estas accións
axudan a establecer vínculos duradeiros con entidades de
investigación de prestixio, como a propia DLR”.
Lembrar tamén que as
comunicacións por satélite é un dos sectores do TIC onde Gradiant
estivo investindo máis esforzos nos últimos anos, non só dentro de
LIFTGATE senón tamén a través da súa participación noutros
proxectos de investigación como BATS (tamén financiado polo Sétimo
Programa Marco da Unión Europea).