Gradiant e Everis presentan este mércores tres avances tecnolóxicos en materia de medicina personalizada

martes, 25 de outubro do 2016 Redacción

Este mércores 26 temos en Compostela unha cita referencial sobre eSaúde, ou sexa, sobre ese ámbito de traballo, investigación e desenvolvemento onde as novas tecnoloxías dan o mellor de si para mellorar cousas como atención médica, os tratamentos e as comunicacións cos doentes. Máis polo miúdo, será unha xornada para presentar tres avances tecnolóxicos de eJKC (eHealth Joint Knowledge Centre). Falamos de OnCare, OnTime e Saludei. Trátase, informa eJKC, de tecnoloxías que teñen en común a súa aposta a prol de ofrecer un servizo de medicina personalizada para cada paciente. Ademais, diríxense a fornecer sistemas que axuden a optimizar os procesos dos equipos sanitarios. A sesión levarase a cabo no Hospital Gil Casares de Santiago.
Lembrar que eJKC é a unidade unidade mixta constituída polo Centro Tecnolóxico Gradiant e a multinacional Everis, coa Fundación Ramón Domínguez como entidade subcontratada. Foi dada a coñecer oficialmente en xuño de 2015, dende a sede se seu no devandito Hospital Gil Casares de Santiago. Segundo fixeron saber daquela os seus impulsores, os seus cometidos principais pasan por promover o desenvolvemento de tecnoloxías para mellorar a nosa calidade de vida e para favorecer o envellecemento activo, poñendo en valor a calidade científico-técnica galega co fin de impulsar liñas de traballo ao redor das necesidades tecnolóxicas dos sistemas sanitarios do futuro.
Como dixemos, o obxectivo da sesión deste mércores é analizar os resultados de tres avances tecnolóxicos destinados a mellorar a calidade de vida das persoas enfermas: OnCare, OnTime e Saludei. As dúas primeiras céntranse no incremento do benestar dos pacientes oncolóxicos. Porén, no seu conxunto, trátase de tecnoloxías que apostan por ofrecer un servizo de medicamento personalizado para cada paciente e ademais, prestar un sistema que axude mellorar os procesos dos equipos sanitarios. Neste encontro eJKC fará un adianto dos avances tecnolóxicos nos que a unidade mixta ten posto o foco para desenvolver e integrar en datas vindeiras.

PUBLICIDADE