Google Wave precisará dun engadido para funcionar no Internet Explorer

Co prefixo cf: podemos empregar o motor de Google Chrome dende Internet Explorer

A vindeira semana Google Wave abrirá as súas probas ao público xeral, pero esta ferramenta de comunicación fai un uso intensivo de HTML5 e outras tecnoloxías web das que os navegadores de Microsoft non fai moi bo uso, e para solucionalo presentan un engadido para o Internet Explorer que permite integrar o motor do Google Chrome, coma solución intermedia, pois abre as portas ao Google Wave sen forzar aos usuarios a cambiar de navegador.

Advertencia que aparece cando accedemos a Google Wave dende Internet Explorer

Tras instalar o Google Chrome Frame, os usuarios que queiran cargar algunha páxina web optimizada para o navegador de Google só terán que engadir no seu enderezo o prefixo cf:, tras o que accederemos ás páxinas solicitadas co motor do Chrome (proceso que será automático en casos puntuais), o que vén a ser un parche mentres continúan a traballar na optimización de Google Wave para o Internet Explorer (aínda que tamén resulta de utilidade para acceder a servizos web que fagan un uso intensivo de tecnoloxía AJAX, para os que o Google Chrome está especialmente preparado).
Aínda que era evidente que Google Wave non funcionaría no Internet Explorer 6, decidiron vetar tamén o seu acceso dende as versións posteriores do navegador web de Microsoft, de xeito que ao intentar cargar Wave dende as mesmas atoparemos unha mensaxe na que advirten que para acceder ao servizo hai que instalar o Google Chrome Frame, mentres que dende os navegadores alternativos coma Firefox, Safari ou o propio Chrome non será preciso realizar ningún tipo de instalación adicional.

Vídeo de presentación do Google Chrome Frame