GALPon retoma a partir do día 25 os seus Sábados Libres na Altamar
luns, 13 de xaneiro do 2014
Volven os Sábados
Libres na Altamar, o que é unha boa nova para usuarios e
desenvolvedores de software libre pero tamén para calquera persoa
que empregue ferramentas tecnolóxicas en calquera das súas
manifestacións. Esta segunda edición dos Sábados Libres na dita
residencia xuvenil viguesa vén unha vez máis da man da asociación
GALPon e sen dúbida ten o mellor dos precedentes na primeira entrega
do ciclo de relatorios e obradoiros, que foi todo un éxito. Esta
nova edición desenvolverase o último sábado dos meses de
xaneiro-xuño e setembro-novembro. Ábrense as xeiras este día 25,
cunha actividade formativa da man de Xesús Amieiro Becerra, a
desenvolver baixo o epígrafe Introdución ao Sistema de Control de
Versións GIT.
Segundo informa GALPon, a asistencia ao obradoiro é
de balde e está aberta ao público en xeral. Porén, polo limitado
do aforo e pola complexidade do curso, estableceuse un límite de 24
prazas. Isto obriga a que sexa imprescindíbel formalizar a
inscrición previamente. Recoméndase levar xa instalado no
computador o paquete GIT e
desaconséllase o uso de interfaces de usuario (IGU/GUI) durante a
xornada. Este obradoiro terá unha segunda parte o sábado 29 de
marzo tamén dirixido por Amieiro Becerra no que se afondará no uso
de GIT. Lembrar que GIT é un software de control de versións
deseñado por Linus Torvalds orientado a achegar eficiencia e
fiabilidade no mantemento de edicións de aplicacións cando estas
teñen un gran número de arquivos de código fonte.
A continuación damos conta dos obradoiros
preparados para o primeiro semestre dos Sábados Libres na Altamar.
-
25
de xaneiro. Sistema
de Control de Versións GIT:
Introdución. Obradoiro dirixido por Jesús Amieiro Becerra.
-
22 de febreiro. Estatística
con R: Introdución. Obradoiro dirixido por Miguel Branco,
investigador no Depto. de Ecoloxía e Bioloxía animal, Universidade
de Vigo.
-
29
de marzo. Sistema
de Control de Versións GIT:
Afondamento. Obradoiro dirixido por Jesús Amieiro Becerra.
-
26 de abril. Estatística con R: Afondamento. Obradoiro dirixido por
Miguel Anxo Rodríguez Muíños, técnico informático na Dirección
Xeral de Innovación e Xestión da Saúde Pública. Consellería de
Sanidade. Xunta de Galicia
-
31
de maio. Programación orientada a obxectos con Python e Vala.
Introdución ao concepto de obxecto e primeiros desenvolvementos.
Obradoiro dirixido por Sergio Costas (aka rastersoft),
desenvolvedor de diversos proxectos de SW
-
28 de xuño.
Programación orientada a obxectos con Python e Vala. Afondamento no
desenvolvemento, uso de frameworks
para Python e Vala. Dirixido por Sergio Costas (aka rastersoft),
desenvolvedor de diversos proxectos de software
libre.