Fillos de Galicia crean unha web para atopar amigos na Rede

Os responsables do portal galego Fillos.org, veñen de presentar publicamente un novo servizo web que lles vai permitir a mozos e mozas de todo o mundo, atopar amigos con intereses comúns a través do emprego de “etiquetas” exclusivamente en galego.
ETiqueTAL.com, que así se chama este novo portal web, conta co apoio da Secretaría Xeral de Política Lingüística da Xunta de Galicia e pretende animar ós internautas a coñecer novos amigos ou atopar parella a través da Rede, segundo afirman, “de xeito sinxelo e de balde”.
Esta web baséase no concepto de semántica, de xeito que cada usuari@ pódese definir a sí mesm@ mediante unha icona, unha frase favorita e unha serie ilimitada de tags ou etiquetas que descreben todo aquelo que lle gusta a cada un. De xeito automático, o sistema avisa de outros usuarios que comparten eses mesmos gustos e ponos en contacto privado mediante un sistema de mensaxería interna.
O responsable técnico desta iniciativa, Manuel Casal Lodeiro, afirma que se inspirou noutras experiencias de contacto persoal e da Web 2.0 para “facer que os mozos galegos empreguen máis o galego para se relacionar entre si na Rede”.
Dende Fillos de Galicia indican que este novo servizo conta xa “con máis de cen usuarios rexistrados”, a pesares de atoparse aínda en fase “beta”, pendente de achegar novas funcións e diversas melloras.