En marcha un novo medio en galego: o xornal en liña Vigo Dixital
luns, 1 de setembro do 2014
Unha boa parte da actividade comunicadora galega
regresa do parón do verán coa chegada de setembro e, con ela, un
novo medio dixital en galego. Falamos de Vigo
Dixital, novo diario en liña centrado como o seu nome indica na
actualidade da principal cidade do país, xurdido das cinzas dunha
chea de medios tradicionais (e non tan tradicionais) da nosa terra
desaparecidos xa e co firme obxectivo (Vigo Dixital) de facer tres
cousas: tirar o máximo proveito das posibilidades das novas
correntes de comunicación en liña (participativas, colectivas,
transparentes), informar en galego a tempo completo e achegarse á
veciñanza tanto como sexa posíbel.
A idea fundamental sobre a que se apoia este novo
medio é de combater “o silenciamento de toda voz crítica e o
servilismo a cambio de subvención ou publicidade”. Con esta arela
de liberdade e de independencia, din os responsábeis do novo xornal,
quérese escindir a información do concepto de mercadoría no que
está practicamente mergullada.
Segundo engaden no texto editorial que acompaña o
arranque da andaina de Vigo Dixital (que desexamos sexa ben longa),
este nace “para ofrecer outro tipo de información local”. En que
medida? Pois para comezar, “sen servilismos e clientelismos” e en
galego, que segue a ser a fin de contas o idioma propio e distintivo.
E engaden, ao respecto desta aposta pola nosa lingua: “Facémolo
pensando, precisamente, nese 92,8% de cidadás e cidadáns que
recoñecen non teren ningunha —ou só algunha pequena— dificultade
para ler no noso idioma, e como contribución para promocionar o seu
uso social”.