En marcha Legaltium, plataforma web de consultas xurídicas de balde
martes, 3 de marzo do 2015
Unha serie de despachos
de avogados do ámbito estatal veñen de unir forzas para achegar un
novo portal de consultas xurídicas con opción de balde. Trátase de
Legaltium, en palabras dos seus
responsábeis “unha web para dar respostas estudadas por
profesionais respecto dos trámites xurídicos dos internautas”.
Segundo engaden os seus creadores, o portal achega claves e
información con posibilidade de solicitalas e recibilas de balde e
da maneira “máis rápida e cómoda posíbel”. Para facer a nosa
consulta, teremos que entrar en en Legaltium, escoller a temática do
caso que teñamos entre mans e elixir a oficina máis próxima para
escribir con detalle a nosa consulta.
O trámite, informan os
impulsores do portal, pode facerse desde casa, a oficina ou mesmo
desde o teléfono móbil sen necesidade de solicitar unha cita
previa, desprazamentos ou esperas. Ademais, o portal ofrece a
posibilidade de xuntar arquivos como notificacións oficiais,
burofax, etc. para axudar ao profesional no estudo do caso. “Unha
vez que se lanza a consulta, o despacho de avogados máis próximo
estudaraa e remitiralle ao internauta a viabilidade do caso sen
ningún compromiso”, sinálase.
O obxectivo do portal, en
última instancia, é contribuír a que os cidadáns superen os
atrancos (medo, desconfianza) que lles impiden abrir un trámite
legal coas actuais plataformas. “Legaltium”, din os seus
creadores, “supera as ditas barreiras cunha rede nacional de
avogados que se unen para mellorar a súa función comercial e
rendibilizar a mercadotecnia online”.
Isto polo que respecta
aos cidadáns. No que atinxe aos propios avogados, a plataforma
diríxese a fornecelos dunha “ferramenta con moito potencial
respecto doutros medios en liña como páxinas de anuncios,
directorios de pago, páxinas de aterraxe, etc”. Doutra banda,
engádese, “os despachos conseguen mellorar a súa reputación
corporativa co uso dunha marca con funcionamento en exclusiva sen
esixir pagos de canons ou licenzas como o puidese facer unha
franquía”.