Emprendedores galegos danse cita en Compostela o vindeiro sábado para celebrar o NOS Day

Hai un par de semanas demos conta dun prometedor encontro para emprendedores chamado Northwest Startup Day (NOS), foro organizado por galegos que fundaron ou traballan en startups que decidiron organizar un ciclo de conferencias concentrado nun día e fuxindo de charlas inspiradoras, técnicas ou anécdotas, buscando achegar valor ás persoas implicadas en proxectos emprendedores “a partires de coñecemento medido, validado e transferible”.
O Northwest Startup Day desenvolverase o vindeiro 4 de xullo de 9:30 a 14:00 horas na Cidade da Cultura de Galicia, e xa é posible inscribirse de balde para poder participar neste encontro que nos últimos días foi modificando o seu programa de charlas, ampliando o número de relatores para quedar finalmente como segue:
10:00 – Ecosistemas de startups: por que e como – José Iglesias, director para Europa de UP Global, deterase en analizar como xorden os ecosistemas emprendores e por que teñen éxito a longo prazo.
10:40 – Erros administrativos que poden matar a túa startup – Anxo Barreiro, director de departamento fiscal de BV Asesores, comentará casos reais con erros mercantís, fiscais e de planificación empresarial que afectaron negativamente a distintos novos proxectos empresariais, dando conta de como proceder para evitalos ou minimizar os seus efectos.
11:20 – Que alguén mate ao “Silicon Valley español” – Jaime Novoa, fundador de Novobrief.com, quere deixar claro que a teima dalgúns políticos de replicar o modelo de Silicon Valley no noso territorio é imposible.
12:40 – Non penses, xoga! – Luz Castro, socia directora de Imaxin, porá exemplos de gamificación para conseguir a satisfacción do usuario e/ou potenciar a aprendizaxe.
13:20 – Como vivir da túa audiencia en 2005, como vivir da túa audiencia en 2015 – Daniel Seijo, fundador de Diariomotor, que debullará os retos e oportunidades dos medios dixitais, que van mudando no tempo, continuando a ser igual de complexos e apaixonantes.