EGATEL sitúase á cabeza da innovación nas empresas galegas
xoves, 30 de xullo do 2015
EGATEL foi
recoñecida no informe ARDÁN 2015
como a empresa máis innovadora de Galicia. É a única
empresa galega que conseguiu alcanzar a categoría ouro dentro do ranking de
Innovación establecido no informe Económico e de Competitividade elaborado
polo consorcio da ZFV co apoio da Axencia Galega de Innovación.
Nos últimos anos EGATEL desenvolveu unha ambiciosa estratexia empresarial
centrada na Innovación. Como resultado, a empresa conseguiu afianzarse nos
mercados nos que xa estaba presente e continuar a súa expansión internacional a
través dunha constante evolución tecnolóxica dos seus produtos. Así mesmo,
EGATEL logrou diversificar a súa carteira de produtos e entrar en novos
mercados, como consecuencia dun intenso esforzo e asignación de recursos de I+D
destinados a transferir o know-how
que posúe a compañía na tecnoloxía dixital e de radiofrecuencia a outros
sectores.
A innovación é un factor clave cando se opera nun sector tan competitivo como o
TIC e nunha economía globalizada. Por este motivo, EGATEL colaborou nos últimos
anos en múltiples proxectos de Innovación con outras empresas, establecendo
sinerxías que permitiron acelerar o desenvolvemento de produtos e o seu
lanzamento ao mercado. EGATEL dedica máis do 35% do seu persoal de maneira
exclusiva a actividades de I+D+i, principalmente no ámbito das comunicacións
por radio frecuencia.
O recoñecemento que obtivo EGATEL como empresa galega máis innovadora non é
froito da casualidade, senón dun firme compromiso coa excelencia tecnolóxica e
constante procura de novas oportunidades de negocio nos sectores de broadcast e satcom.