EGATEL amosará en Las Vegas a súa aposta para as comunicacións vía satélite
martes, 31 de marzo do 2015
A empresa galega EGATEL,
referente internacional en materia de equipamento e servizos de
telecomunicacións, vén de confirmar que estará presente os días
vindeiros en Las Vegas, Estados Unidos, no marco do salón NAB
Show 2015 (entre o 13 e o 16 de abril), amosando os seus
transmisores de TV de alta frecuencia e banda ancha e máis os
detalles concretos de Smart
LNB, un desenvolvemento de seu co que reafirma “a súa entrada
no mercado SatCom”, sinalan fontes de EGATEL.
Por certo que Smart LNB é
un terminal desenvolvido para Eutelsat
Communications, principal operador europeo de satélites, e un
dos tres maiores do mundo. Trátase dun dispositivo que permite
achegar servizos de TV conectada vía satélite. Como lembraremos,
EGATEL
xuntou forzar con Eutelsat para converterse en provedor de equipos
para a televisión interactiva.
Na cita de Las Vegas,
onde
EGATEL xa é unha vella coñecida, a firma galega terá o seu
centro de operacións na caseta SU10107. Como dixemos, dende alí
amosaranse os detalles dos seus transmisores de TV de alta frecuencia
e banda ancha da serie WHET (Wideband High Efficiency
Transmitters), tanto na súa modalidade de refrixeración líquida
como a de aire. Tamén se exhibirá o terminal Smart LNB, un equipo
de última xeración fortalecido cun novo transceptor conectado á
antena parabólica e que dispón dunha canle de retorno de alta
eficiencia. Segundo avanza a firma galega, “o dispositivo
revolucionará o mercado SatCom, ao abrir a porta a unha ampla gama
de servizos de TV conectada vía satélite como HbbTV, redes sociais,
operacións de compra, consumo de contidos á carta, etc; así como a
aplicacións Machine to Machine (M2M), e-saúde, fogar
dixital, etc”.
Como exemplo da serie
WHET refrixeración líquida mostrarase un Transmisor Doherty - Banda
Ancha de 3,3 kWrms DVB/ISDB (5 kWrms ATSC), modelo TLWH7804. “Este
equipo caracterízase polo seu deseño completamente modular e inclúe
un sistema de bombas integrado no mesmo rack que o transmisor”,
explican fontes de EGATEL, que engaden que a solución é quen de
optimizar o investimento e o deseño das instalacións”.
En refrixeración por
aire, tamén dentro da serie WHET, presentarase un Transmisor Doherty
Banda Ancha de 600 Wrms DVB/ISDB (1 kWrms ATSC), modelo TUWH4601,
en funcionamento real sobre carga. Segundo explica a empresa con sede
na Tecnópole de Ourense, “o deseño dos amplificadores desta serie
inclúe aspectos que sintetizan todo o coñecemento adquirido de
EGATEL, evitando a circulación de aire por placas ou compoñentes,
redundando fontes de alimentación extraíbeis polo frontal ou
dispondo os ventiladores na parte exterior para unha sinxela
substitución sen necesidade de abrir o módulo”.