EGANET entrega os seus premios perante máis de 200 representantes do noso sector TIC

EGANET, como cada ano, mobilizou ao sector TIC galego para elixir ás empresas, entidades, organizacións e persoeiros que máis e mellor traballaron ao longo do ano por afianzármonos un pouquiño máis no tecido innovador e por deixar unha pegada nosa, perfectamente recoñecible, nese tecido. Finalmente, e tal e como deu a coñecer a asociación na gala de entrega dos seus premios anuais desenvolvida no Auditorio de Santiago, estas foron as compañías e entidades galardoadas nas diferentes categorías: La Nuestra Comunicación Publicitaria, Ir Indo Edicións, Buenas Ideas en Acción, Fausto Deseño Asociados, Imaxin Software, Continental Producciones, Neo, Teimas Desenvolvemento, a Universidade de Santiago e a Plataforma Vindeira.
Tanto os premiados como os obxectivos estratéxicos das empresas TIC que integran EGANET foron desvelados no transcurso dunha gala que reuniu (malia as inclemencias do tempo) a máis de 200 persoas en Santiago e que contou coa presenza activa da presidenta da dita asociación empresarial, Beatriz Legerén, encargada de dar a benvida a asistentes e participantes.
Por certo que o responsable de pórlle ao acto o punto e final foi Víctor López, responsable de Administración Dixital e directivo de EGANET, quen aproveitou a ocasión para pedirlles máis compromiso a tódolos axentes implicados no impulso do sector TIC galego, en especial as administracións, ás que animou a fixar a súa atención nas necesidades e no potencial do dito tecido produtivo, sobre todo á hora de planificar e xestionar as políticas sectoriais. Víctor López cualificou como grande oportunidade de impulso ao dito eido empresarial o inminente afianzamento da Administración Electrónica, de aí que alentara aos representantes das institucións públicas presentes na gala “a investir e non a coartar a ocasión para que Galicia se dote de mellores e máis eficaces servizos administrativos, creando riqueza e emprego no país”. Asemade, aproveitou a oportunidade para ofrecer, dende EGANET e as compañías que representa, o apoio e cooperación que sexan precisos.
O número de firmas e entidades que competiron foi de 135, constituíndo un total de 221 candidaturas nas diferentes categorías.
As candidaturas gañadoras resultaron ser as seguintes:
Premio PUBLICIDADE ONLINE:
· LA NUESTRA COMUNICACIÓN PUBLICITARIA, con sede en Oleiros, pola nova edición da campaña Movemento contra a Lei de Murphy. A Campaña 2008 de prevención de riscos laborais dirixida ao alumnado de Formación Profesional, renovou a mensaxe da edición anterior cun xogo específico online no que compiten os distintos centros e unha nova páxina web. Internet constitúe a canle central da campaña, que presenta unha total identificación coa linguaxe xuvenil e a comunicación online.
Premio APLICACIÓN ON-LINE:
· IR INDO, con sede en Vigo, polo dicionario en liña Digalego. Máis de 65.000 entradas actualizadas á última normativa, máis de 45.000 traduccións ao portugués, inglés e castelán, etimoloxías, sinónimos, exemplos… Intégrase directamente nos navegadores Internet Explorer e Mozilla Firefox mediante unha caixa de busca e conta coa opción de clickar en calquera palabra do texto para que unha ventá interactiva defina a palabra marcada automaticamente, función tamén integrable noutras webs.
Premio E-COMMERCE:
· BUENAS IDEAS EN ACCIÓN, de Pontevedra, pola web Planetapluton.com. Comercio online especializado en productos novidosos, orixinais, sorprendentes e divertidos, produtos non dispoñibles noutros comercios. O abano da súa oferta inclúe gadgets electrónicos, produtos de decoración e deseño, agasallos, xoguetes e produtos para nenos e produtos de aventura. Detallado catálogo, distintas formas de pago e deseño atraente completan as posibilidades de Planetapluton.
Premio SOFTWARE LIBRE:
· UNIVERSIDADE DE SANTIAGO DE COMPOSTELA, pola Oficina de Software Libre da USC. Nacida no ano 2008 a partir dun acordo entre a Xunta e a USC co obxectivo de analizar, promover e implantar o software libre na comunidade universitaria. O proxecto parte da elaboración dun plano de acción con diversas frontes, e polo momento as actividades da Oficina xa abrangueron as áreas de tradución, desenvolvemento de software, formación, difusión, análise e asesoramento, incluíndo un plano piloto de migración a software libre en cinco titulacións distintas
Premio COMUNICACIÓN WEB:
· FAUSTO DESEÑO ASOCIADOS, de Santiago, polo “Universo Galimatías” trata de achegarlles a rapaces de entre os 14 e os 18 anos contidos en galego que en xeral consomen en castelán dun xeito normalizado. Os protagonistas son dous adolescentes, Gal e Matías, que son como calquera mozo do noso tempo. A navegación por este portal realízase a través dos obxectos que poboan o seu cuarto, a través dos cales se accede a contidos de interese para os rapaces.
Premio CULTURA DIXITAL:
· CONTINENTAL PRODUCCIONES, con sede na Coruña, por Evento Ligado á Extinción (ELE). Videoxogo de acción (First Person Shooter), cuxo deseño artístico, guión, banda sonora, e todas as demais variables se analizaron para responder a tres obxectivos básicos: deseñar o primeiro videoxogo galego de distribución internacional; compor unha experiencia de xogo con ritmo que incorpore fórmulas cinematográficas; e pór sobre a mesa unha proposta visualmente novidosa.
Premio MELLOR AMBIENTE LABORAL:
· FACTORÍA DE SOFTWARE E MULTIMEDIA (IMAXIN SOFTWARE), de Santiago de Compostela. Empresa dedicada ao desenvolvemento de servizos e solucións avanzadas de software e multimedia, con sede en Santiago. Vén de implantar a metodoloxía CMMI no seu nivel 3 e basea a súa estratexia empresarial no obxectivo de ser unha compañía socialmente responsable e sostible no tempo. Foi incluída como empresa exemplo de boas prácticas na Guía de boas prácticas en corresponsabilidade editada pola Secretaría Xeral de Igualdade da Xunta.
Premio TECNOLOXÍA ACCESIBLE:
· NEO, con sede na Coruña, por Bildo, a Comunicación Universal. Videotraductor virtual deseñado para facilitar ás persoas xordas a comunicación en Lingua de Signos Española nas oficinas de institucións públicas e empresas con atención ao público. Trátase dun sistema integrado de hardware e software de videoconferencia especialmente adaptados ás necesidades deste colectivo
Premio E-EMPREDEDORES:
· TEIMAS DESENVOLVEMENTO SL. (Tecnoloxías da Información MedioAmbientaiS) tamén compostelá, é unha empresa de desenvolvemento de software como servizo dispoñible en Internet e que achega solucións tecnolóxicas para o sector ambiental (xestión e transporte de residuos, vertedoiros, tramites telemáticos coa administración, etc.). A empresa está a desenvolver a plataforma de xestión Teixo, para empresas implicadas no proceso de xeración e xestión de residuos, adaptada ao estándar de comunicación e3l.
Premio Especial EGANET:
· PLATAFORMA VINDEIRA. Creada no ano 2006 con sede na Escola Técnica Superior de Enxeñeiros de Telecomunicacións de Vigo como un punto de encontro e diálogo de todos os axentes relacionados co sector Tic. O seu obxectivo é o de fomentar e producir sinerxías entre os axentes galegos interesados nas Tecnoloxías da Información e das Comunicacións, para participar na planificación da investigación e o desenvolvemento na industria Tic de Galicia e posicionala como líder en sectores estratéxicos. Desenvolve múltiples actividades que permiten a participación activa das empresas dentro dos grupos específicos de traballo.