DivulgACCIÓN reúnese este sábado na procura da excelencia na divulgación científica galega

O terceiro encontro anual da Asociación Galega de Comunicación de Cultura Científica e Tecnolóxica, DivulgACCIÓN, será celebrado o vindeiro sábado 14 de xuño no Museo Nacional de Ciencia e Tecnoloxía (MUNCYT) da Coruña. O encontro -que dará comezo ás 11 horas- persegue intercambiar experiencias e boas prácticas no eido da divulgación científica en Galicia. A novidade desta edición é a posibilidade aos socios de presentar proxectos ou experiencias propias (5 experiencias). Para pechar, de 13.30 a 14.30h, terá lugar o relatorio convidado a cargo do director técnico da Casa das Ciencias, Marcos Pérez, arredor do desafío do vídeo inmersivo aplicado a programas de planetario dixital. O evento é de balde e está aberto ao público xeral.
Máis polo miúdo, no primeiro bloque da xornada exporanse tres experiencias no ámbito da divulgación científica en Galicia. Marián Freire (profesora de Bioquímica e Bioloxía Molecular da UDC) exporá a súa experiencia de divulgación científica con alumnos universitarios. Rubén Fernández falará da asociación Bricolabs, conformada por un grupo de persoas con inquietudes relacionadas coa electrónica e o hardware libre e Roberto Agis-Balboa (investigador do Instituto de Investigación Biomédica da Universidade de Vigo) falará sobre a epixenética en doenzas neurodexenerativas e de como se debe comunicar. Tamén se presentarán os portais web Gciencia e 4gotas. Pablo López (redactor e promotor de Gciencia), presentará esta web de información e divulgación científica e Carlos Balseiro (meteorólogo e impulsor do proxecto 4gotas), falará desta web de información e servizos relacionados coa meteoroloxía. A xeito de peche, o director técnico da Casa das Ciencias, Marcos Pérez, impartirá unha conferencia arredor do tema “π-360º, o desafío do vídeo inmersivo para programas de planetario dixital”. Para máis información cómpre acceder ao programa do evento.