Desestiman a demanda civil contra Elrincondejesus.com

Jesús Guerra, responsable de Elrincondejesus.com, a carón do seu avogado, Carlos Sánchez Almeida, nunha imaxe publicada por El Mundo.

Nos últimos anos as industrias discográfica e cinematográfica emprendeu numerosas accións contra páxinas web dedicadas ao intercambio de arquivos audiovisuais a través de redes P2P, pero os xulgados sempre consideraron que os feitos denunciados non supoñen delito punible pola vía penal, o que levou aos denunciantes a cambiar a súa estratexia e recorrer á vía civil, sendo o primeiro dos casos deste tipo que chega a unha sentenza o relativo á web Elrincondejesus.com, que hai preto dun ano xa conseguira que o maxistrado Raúl N. García Orejudo, do Xulgado Mercantil nº 7 de Barcelona, rexeitase impor medidas cautelares á web denunciada, e finalmente concluíu coa desestimación íntegra da demanda formulada pola Sociedade Xeral de Autores e Editores (SGAE), aínda que esta sentenza non é firme.

Sentenza do caso contra Elrincondejesus.com

Estariamos así ante unha sentenza histórica, pois senta un precedente moi importante ao asegurar claramente que o intercambio de arquivos a través da Internet non vulnera os dereitos de propiedade intelectual e, máis concretamente, que as páxinas web con ligazóns a redes P2P non supoñen unha explotación das obras sempre que os ficheiros intercambiados veñan dunha fonte lexítima, non se comercialice con eles e non se realice unha comunicación pública (considérase que o intercambio entre particulares é un acto de copia privada).
Queda agora por ver se esta sentenza (descargable en formato PDF) influirá ao Goberno e á súa formulación da Lei de Economía Sustentable na que pretendían establecer medidas contra o intercambio de ficheiros na Rede, pois resultaría bastante contraditoria a creación dunha comisión dedicada a perseguir unha práctica que os xuíces non consideran ilegal.