Coruña acolle esta semana unhas xornadas sobre o potencial das tecnoloxías móbiles no eido da saúde

mércores, 22 de abril do 2015 Redacción

Sinatura do acordo formalizado entre o COETG e o Colexio de Médicos da Coruña

O Colexio Oficial de Médicos da Provincia da Coruña e o Colexio Oficial de Enxeñeiros de Telecomunicación de Galicia organizan mañá e pasado mañá, 23 e 24 de abril, as primeiras Xornadas sobre Aplicacións Móbiles na Saúde, uns encontros convocados para axudar aos facultativos a aproveitar as novas tecnoloxías na súa práctica diaria. Desenvolveranse na sede do Colexio Médico na Coruña, na Avenida de Salvador de Madariaga, 66, de 17.00 a 20.30 horas.
As charlas serán impartidas por enxeñeiros colexiados de telecomunicación, e terán, en palabras dos organizadores, “un marcado carácter práctico”. O xoves, os temas a tratar serán a aplicación de dispositivos móbiles na consulta médica, a forma de seleccionar as aplicacións máis axeitadas a cada caso, a procura de información, a axuda ao diagnóstico, e as ferramentas de apoio para o seguimento, rexistro e seguimento de pacientes.
O venres 24 de abril poranse sobre a mesa os usos desta tecnoloxía para o control de doenzas concretas, como a hipertensión (tensión alta), a doenza pulmonar obstrutiva crónica (EPOC), a diabetes, a hipercolesteriolemia (colesterol alto) e as afeccións da pel. Esta actividade, explican os colexios, é o primeiro resultado do convenio de colaboración que ambas as institucións colexiais asinaron o pasado 25 de marzo, e no que se comprometeron a traballar xuntas para “fomentar o desenvolvemento e a incorporación das novas tecnoloxías da comunicación e a Sociedade da Información no ámbito médico”.

PUBLICIDADE