Confirman a sanción ao Concello de Málaga pola súa rede Wi-Fi pública

A primeiros do ano pasado a Comisión do Mercado de Telecomunicacións (CMT) impuxo ao Concello de Málaga unha sanción de 300.000 euros por ofrecer servizos de comunicacións electrónicas sen estar inscrito no rexistro de operadores, no que consideran que trátase dunha infracción moi grave ao explotar unha rede pública de comunicacións (concretamente unha rede Wi-Fi) e prestar un servizo como provedor de acceso á Internet sen presentar ante a CMT a notificación pertinente, multa que vén de confirmar unha sentenza da Audiencia Nacional, que certifica que os organismos públicos que ofrezan este tipo de servizos deberán cumprir coas mesmas condicións que os operadores privados.
O Concello de Málaga pretendía levar a Internet a través de Wi-Fi a todo o seu casco urbano, e para non ter que constituírse como operador aseguraba que a súa rede sen fíos chamada Biznaga constituía un caso de autoprestación (ou sexa, que sería só para uso interno do Concello) o que a CMT determinou que non era certo, por ser posible ao cidadáns acceder de xeito a esta rede en distintos puntos da cidade.
A CMT publicou unha serie de condicións (nunha circular que podemos descargar en formato PDF) que deben cumprir as administracións públicas que queiran dar servizos de Internet sen fíos, como sería limitar o acceso ás páxinas das administracións, permitir as conexións dende bibliotecas e centros educativos sempre que os usuarios estean identificados e limitar a velocidade destas redes e que non cheguen a edificios residenciais.