Compostela estrea un mapa en liña que localiza as poképaradas e os ximnasios Pokémon

Esta mañá a concelleira de Turismo de Santiago de Compostela, Marta Lois, presentou Pokésan, un novo proxecto dirixido a fomentar o turismo familiar na capital de Galicia aproveitando as posibilidades que abre Pokémon GO, fenómeno de masas de grande penetración entre a rapazada de todo o mundo.
Para amosar ao público este novo servizo contouse coa presenza do responsable do seu desenvolvemento informático, Camilo Ameijeiras, consistindo esta nova funcionalidade da páxina web de Turismo de Santiago nun mapa de Compostela no que figuran xeoposicionadas 176 poképaradas e 18 ximnasios, permitindo así que os interesados poidan explorar virtualmente a cidade, coñecendo así os puntos clave para xogar a Pokémon GO, que na súa meirande parte coinciden con localizacións de interese turístico, de aí que este xogo móbil case moi ben coa cultura, o turismo e o lecer en familia.
Na cidade de Santiago de Compostela podemos ver así como as poképaradas nas que podemos recoller obxectos virtuais para Pokémon GO están repartidas en lugares como a Casa da Troia, a Fonte dos Catro Cabalos, a estatua das Marías ou o Instituto da Lingua Galega, mentres que os ximnasios onde se enfrontan os adestradores Pokémon están repartidos pola Catedral, a estatua a Montero Ríos ou o Parlamento de Galicia. Todos lugares que un visitante estará interesado en percorrer, á vez que a súa escolma tamén anima aos veciños a descubrir monumentos e edificios significativos do seu contorno que moitas veces pasan desapercibidos, e que grazas a Pokémon GO contan agora con incentivos para a súa visita.