Comezan no centro San Vicente de Paúl as actividades de voluntariado e formación da Aula TIC-PEME
xoves, 6 de febreiro do 2014
A solidariedade TIC comeza no intre en que un
usuario con coñecementos axuda a outro usuario a resolver dúbidas
ou empregar algún programa. Esta, aplicada de xeito colectivo, é a
base do programa Abrimos unha fiestra ao mundo para TI(C), un
ciclo de actividades do que falamos os días pasados con motivo da
súa presentación e que vén da man da Aula TIC-PEME da
Universidade de Santiago de Compostela, contando con financiamento da
Fundación La Caixa. Pois ben, o programa de accións comezou xa este
mércores 5 de febreiro, nunha das aulas de informática da Facultade
de Administración e Dirección de Empresas de Lugo. Tanto nesta
sesión coma nas seguintes, participan un grupo de estudantes
voluntarias do dito centro formando
no eido das TIC a persoas con diversidade cognitiva residentes no
centro San Vicente de Paúl.
Segundo informa a responsábel da Aula TIC-PEME da
Universidade de Santiago, a profesora Ángeles López Cabarcos,
estamos perante “un proxecto de alfabetización informática que se
axusta aos obxectivos que propiciaron a creación da Aula, como a
activación de propostas de formación e asesoramento de capital
humano asociado ás TIC”. Esta actividade, di a profesora,
“salienta polo seu marcado perfil solidario e tamén por afondar na
responsabilidade social da Universidade”. Asemade, foi posta en
marcha “para contribuír a ampliar a oferta formativa dun colectivo
en risco de exclusión social”, o das persoas con diversidades
cognitivas. A idea é mellorar o seu grao de empregabilidade e evitar
que fiquen illadas da Sociedade da Información.
Este proxecto botou a andar no mes de novembro co
proceso de selección de universitarias voluntarias interesadas en
participar. Unha vez rematada a selección de candidatas/os,
completaron un programa de formación específico no que adquiriron
as habilidades e competencias precisas para desenvolver este programa
de alfabetización informática. Ao remate deste proceso de
formación, as voluntarias universitarias achegarán o seu
coñecemento e asesoramento nas distintas sesións que se celebrarán
nunha das aulas de informática da Facultade de ADE. Este programa de
formación, que contempla un total de oito sesións, comeza xa este
mércores. As outras xornadas de alfabetización informática
programadas ao abeiro deste proxecto desenvolveranse ao longo do mes
de febreiro e nas primeiras semanas de marzo.