Comeza a facer ruído a terceira entrega do Congreso #InLugo
venres, 17 de abril do 2015
Haberá
terceira edición do Congreso
#InLugo, e será de novo na Cidade de Muralla. Así
nolo confirmou este venres a Deputación de Lugo, que definiu o
evento como “un xeito de converter a cidade nun centro de
referencia da cultura dixital e as redes sociais a través dun
encontro que xa é o máis importante de Galicia sobre as devanditas
temáticas, e un dos máis destacados a nivel estatal”. A vindeira
entrega do foro, que será novamente de balde e para todos os
públicos, desenvolverase no Pazo de San Marcos os días 8 e 9 de
maio. Contará coa presenza de 30 persoeiros de renome en materia de
comunicación TIC, como Ignacio Escolar, Andrés Milleiro, Víctor
Tasende, Juan García ou Roberto Carreras.
A
vicepresidenta Segunda, Lara Méndez, acompañada polo director de
Fondos Europeos da Deputación, Pablo Rivera, presentou este venres
17 a terceira convocatoria deste encontro nacido “co obxectivo de
fomentar o uso da rede e das novas tecnoloxías entre todos os
sectores da poboación e reflexionar sobre o papel das mesmas na
sociedade actual”. Segundo salientou a vicepresidenta, “a
Deputación leva oito anos apostando polas TIC como elemento motor de
desenvolvemento, e un encontro
tecnolóxico das características deste é, ademais, un escaparate de
excepción para a promoción económica e turística da provincia e
Galicia”.
Na
presentación tamén se fixo reconto polos froitos e repercusións
acadados polo congreso nas redes sociais. Segundo engadiron, a
xuntanza vén conseguindo en cada entrega ser trending
topic en Twitter, “o que supón unha gran proxección da
provincia e do talento lucense”.
O congreso
contará cunha “ampla programación”, con debates e relatorios
nos que expertos procedentes de todos os recantos da xeografía
estatal avaliarán “os cambios de hábitos, mentalidades, formas de
comunicación e estilos de vida que está a provocar Internet na
sociedade actual”. Todo isto baixo a óptica de cuestións como a
seguridade en liña, o dereito na Rede, a mercadotecnia dixital ou a
repercusión das comunidades 2.0.
Polo
congreso pasará, como dixemos, Ignacio Escolar, ex director de
Público e na actualidade director de eldiario.es,
que será o encargado de abrir o evento. Na conferencia compartirá a
súa experiencia liderando os ditos xornais de referencia e
reflexionará sobre os desafíos que afrontan os medios nun panorama
de comunicación completamente novo. Na cita tamén participarán
David Varona (@davarona), redactor xefe de proxecto, participación e
social media en RTVE; David Lombao (@davidlombao), director do xornal
dixital Praza Pública; Andrés Milleiro (@juanmilleiro), director de
Social Media de NH Group; ou Víctor Tasende (@victortasende),
deportista e blogueiro. Segundo fai saber a organización, o cadro de
relatores irase ampliando ata completar unha listaxe de preto de 30
nomes, cuxo perfil e traxectoria irase desvelando nos vindeiros días
na páxina web oficial do congreso
e as redes sociais do evento, Facebook
e Twitter. O programa
completarase coa presentación en detalle de casos de éxito
empresarial ou social relacionados coa Rede, facendo fincapé
naqueles que teñen a súa orixe na provincia de Lugo e en Galicia.
Ao fío disto, pasarán polo congreso Idoia Cuesta, artesá vasca
establecida na provincia que vén de recibir o Premio Nacional de
Artesanía; e varios proxectos lucenses máis.
Como peche
ao congreso realizarase a tradicional entrega dos Premios InLugo,
convocados coa intención de recoñecer o labor e o empeño posto por
empresas e proxectos lucenses no ámbito dixital, conta con catro
categorías: Comercio, Ocio e Restauración; Educación e
Formación; Cultura e Acción Social; e Tecnoloxía.
As persoas
interesadas en optar a estes premios deberán presentar as súas
candidaturas a partir do 23 de abril, até o vindeiro 5 de maio ás
20:00 horas na páxina web inlugo.com. Unha vez finalizado este
prazo, un xurado técnico será o encargado de valorar as
candidaturas recibidas e elixir o gañador de cada categoría. A
cerimonia de entrega dos galardóns celebrarase ás 19:30 horas do 9
de maio.