Comeza a conta atrás para que a Arroutada Party abra as súas portas
mércores, 9 de setembro do 2009
O persoal responsable do
acondicionamento do Coliseo da Coruña, ten xusto un mes de prazo, dende hoxe, para
equipar as súas instalación e preparalas con todo o necesario para celebrar un
maratón informático de primeira categoría: a Arroutada Party, que terá lugar na cidade
herculina do 9 ao 12 de outubro.
O mesmo que teñen de prazo (para ir
preparando os seus equipos e os seus dispositivos de almacenamento) as persoas
interesadas en participar neste evento, que este ano celebra a súa decimosexta
edición e que non vai deixar a ningún participante con mal sabor de boca.
Os organizadores da festa teñen
previsto que ao longo de catro días de intensa actividade, os asistentes
disfruten á súa maneira de todo o que a tecnoloxía pode dar de sí, a través de
obradoiros, campionatos, demostracións, concursos, videoxogos… que se
completarán con actividades en torno ao software libre e ao Scene, o movemento social dos artistas
informáticos, que tamén se dará cita neste evento.
A rede deste ano, ao igual que na
anterior edición, será cedida pola empresa Circo Systems, e de novo, este festa
informática contará cunha conexión a Internet simétrica e de calidade.
No tocante á extranet, unha das
áreas máis visitadas polas persoas alleas á party en sí, este ano estará
composta por varias consolas con xogos, un futbolín, unha mesa de ping-pong e
varias mesas con cartas, sobre todo con vistas a que os participantes “poidan descansar un pouco de tanto ordenador
e consigan un anaco de lecer”.
A asociación AMIGA (Asociación da
Mocidade Informática Galega) da Coruña, a organizadora deste evento, constituiuse
no ano 1997 co obxectivo de “demostrar
que os ordenadores non son simplemente ferrallos de oficina”; dende entón
esta entidade non deixou de traballar en prol da difusión das novas tecnoloxías
e Internet por toda a sociedade (en especial da máis moza) facendo especial
fincapé (e isto é moito de agradecer) na extensión do galego dentro deste
sector.