Chuza! dirá adeus a noite do domingo

O administrador de Chuza, Berto Yáñez, na redacción de Vieiros hai uns anos

Cando moitos aínda non foran quen de dixerir a noticia do peche de Vieiros, dende o blog de Chuza, o servizo galego de recomendación de novas na que os propios usuarios eran os que definían a súa liña editorial a través das súas votacións e comentarios, anuncia o seu peche para a noite do día 25, de xeito que o vindeiro luns Chuza non estará operativo, ante a imposibilidade do seu administrador de continuar a manter un sistema cada vez máis complexo e non ter atopado a alguén axeitado para coller o seu relevo.
Berto Yáñez asegura que o traspaso dunha páxina web é algo máis complexo que pasar un contrasinal, aínda que lembra que o código co que funciona Chuza é aberto, así coma o de Menéame (no que se basea Chuza), de xeito que resulta relativamente doado lanzar outro servizo semellante para encher o oco que queda na Internet galega.
Para evitar que os contidos de Chuza queden no esquecemento, traballarase para manter o arquivo público, aínda que inicialmente non estará dispoñible pois para iso hai que solucionar antes certos detalles técnicos. Tamén queda o compromiso de que se xurde unha iniciativa representativa da comunidade chuceira actual, esta será enlazada visiblemente ao acceder a Chuza.gl no futuro.
Actualmente Chuza conta con 5.712 usuarios rexistrados, entre 85.000 e 102.000 usuarios únicos ao mes, está entre as 50 páxinas web galegas máis populares e, en definitiva, convertérase nun referente informativo para moitos galegos, polo que a partir da semana que vén a súa ausencia deixarase notar, e só queda agardar a que iniciativas semellantes ocupen o seu lugar.